माजी मंत्री, आमदार बच्चू कडू यांनी गुवाहाटीला जाऊन पैसे घेतल्याचा गंभीर आरोप रवी राणा यांनी केला होता. यावरून बच्चू कडू आणि रवी राण यांच्यात ‘सामना’ रंगला आहे. त्यात ‘सत्तेतील दोन आमदार खोक्यांवरून भिडले आहेत,’ अशी टीका शिवसेना आमदार आदित्य ठाकरेंनी बच्चू कडू आणि रवी राणांवर केली होती. याला रवी राणांनी प्रत्युत्तर दिलं आहे.
“आदित्य ठाकरे आणि उद्धव ठाकरेंनी ‘मातोश्री’वरून बसून खोक्याचं राजकारण सुरु केलं. किशोरी पेडणेकरांनी आदित्य आणि उद्धव ठाकरेंना किती खोके पाठवलं हे संपूर्ण महापालिकेला माहिती आहे. खोक्याशिवाय यांचं पान हालत नव्हते. महापालिकेचा पैसा ठेकेदारांच्या घशात घालण्याचं काम त्यांनी केलं,” असा आरोप रवी राणांनी केला आहे.
“बाळासाहेबांचे विचार विसरून उद्धव ठाकरे काँग्रेसच्या विचारांवर चालत होते. बाळासाहेबांच्या संपत्तीचे वारसदार उद्धव ठाकरे आहेत. मात्र, विचारांचे वारसदार एकनाथ शिंदेंबरोबर असलेले आमदार आहेत. बाळासाहेबांचे सच्चे शिवसैनिक एकनाथ शिंदे यांच्यासमवेत आहेत,” असेही रवी राणांनी म्हटलं.