लालू यादवांच्या राजदकडून नव्या संसदेची शवपेटीशी तुलना; भाजपा नेते म्हणाले, “हेच तुमचं भविष्य”

लालू प्रसाद यादव यांचा पक्ष राष्ट्रीय जनता दलने देशाच्या नव्या संसद भवनाची तुलना शवपेटीशी केली आहे. पक्षाच्या अधिकृत ट्विटर हँडलवरून त्यांनी दोन फोटो शेअर केले आहेत. यापैकी पहिला फोटो शवपेटीचा तर दुसरा फोटो नव्या संसदेचा आहे. राजदने “हे काय आहे?” असा प्रश्न कॅप्शनमध्ये उपस्थित केला आहे

दरम्यान, या ट्वीटनंतर बिहारचे माजी उपमुख्यमंत्री सुशील कुमार मोदी यांनी राजदवर पलटवार केला आहे. सुशील मोदी यांनी एक व्हिडीओ ट्वीट केला आहे. याद्वारे त्यांनी राष्ट्रीच जनता दलावर निशाणा साधला. तसेच शवपेटीवाल्या ट्वीटवर प्रतिक्रिया दिली आहे.

हे ही वाचा >> ”देशात राज्यसभा आहे की नाही?” नव्या संसदेच्या उद्घाटनावरून सुप्रिया सुळेंचा मोदी सरकारला प्रश्न; म्हणाल्या, “कार्यक्रमाला गेलो असतो, पण…”

सुशील कुमार मोदी म्हणाले की, राजदचे खासदार आता राजीनामा देणार का? संसदेची तुलना शवपेटीशी केल्याबद्दल राजदवर देशद्रोहाचा खटला दाखल करायला हवा. राजदच्या या ट्वीटवरून त्यांची मानसिकता दिसते. हा पक्ष नेहमीच देशाचा अपमान करत आला आहे. राजदने जे दोन फोटो शेअर केले आहेत, त्यापैकी दुसरा फोटो म्हणजेच भारतीय संसदेचा फोटो हे भारताचं भविष्य आहे आणि पहिला फोटो म्हणजेच शवपेटीचा फोटो हे राजदचं भविष्य आहे.