नाशिक-पुणे मार्गावर पिस्तूलचा धाक दाखवत लूट, सहा लाखांची औषधे पळवली

संगमनेर तालुक्यातील पठार भागातील माहुली घाटामध्ये ही घटना घडली असून त्यात ट्रक चालकाच्या तोंडाला रुमाल लावून, त्याला बेशुद्ध करत, पिस्तूलचा वापर करीत लुटमार केल्याची घटना घडली. घारगाव पोलीस ठाण्याच्या हद्दीलगत पुणे जिल्ह्याचे सीमा असल्याने अहिल्यानगर, पुणे जिल्ह्यातील गुन्हेगारांची या परिसरात मोठी वर्दळ असते. त्यातून सातत्याने वेगवेगळे गुन्हे वारंवार घडत आहेत. पोलिसांना मात्र या गुन्हेगारीवर नियंत्रण मिळवण्यात अपयश येत आहे.

नुकत्याच झालेल्या लुटी बाबतची माहिती अशी की, सिद्धिविनायक लॉजिस्टिक कंपनीचा शेती औषधांचा माल घेऊन फुरसुंगी, पुणे येथून लेलँड कंपनीचा ट्रक (एमएच ४२ ए क्यू ८०७८) हा नाशिककडे चालला होता. चाळकवाडीच्या पुढे रात्री दोन वाजण्याच्या सुमारास दोन अज्ञात तरुण इसम हात दाखवून ट्रकमध्ये बसले. या दोन अज्ञात इसमांचे नाव पत्ता सदर ट्रक चालकाला माहित नाही.

त्या दोघांनी संगमनेरला जायचे आहे असे सांगितले होते. त्यानंतर हे सर्व त्या ट्रकमधून संगमनेरकडे निघाले असता पहाटे चार वाजण्याच्या सुमारास माहुली घाटामध्ये त्यातील एकाने लघुशंकेला लघुशंकेला जायचे असल्याचे सांगून चालकास गाडी थांबवण्यास भाग पाडले व तो खाली उतरला. त्यानंतर गाडीत बसलेल्या दुसऱ्याने चालकाच्या कमरेला पिस्तूल लावले व खाली उतरलेल्या इसमाने दरवाजाच्या बाजूने येऊन पांढऱ्या रंगाचा रुमाल नाकाला लावल्यानंतर चालक बेशुद्ध पडला. बेशुद्ध झालेल्या चालकाला केबिनमध्ये टाकून चोरट्यांनी आपला डाव साधला. सकाळी साडेसात वाजण्याच्या सुमारास सदर ट्रक चालक शुद्धीवर आल्यानंतर त्या ट्रकमधील शेतीमालाचे औषध बॅग, बॉक्स गायब झालेले त्यास आढळून आले. या ट्रकमध्ये सिद्धिविनायक लॉजिस्टिक कंपनीचे शेतीमालाचे औषधाचे ५ लाख ७२ हजार २१४ रुपयांचे १८१ बॉक्स होते.

या संदर्भात ट्रकचालक दीपक किसन कदम (वय ४२ वर्ष, रा. राजगुरुनगर, ता. खेड, जि. पुणे) यांनी फिर्याद दिली. त्यांच्या फिर्यादीवरून दोन अज्ञात व्यक्तींविरुद्ध गुन्हा दाखल केला असून पोलीस पुढील तपास करत आहेत.