मराठा आरक्षणाच्या प्रश्नावरून मराठा आंदोलक आक्रमक झाले आहेत. बीडमध्ये राष्ट्रवादी काँग्रेसचे आमदार प्रकाश सोळंके यांचा बंगला पेटवल्यानंतर आमदार संदीप क्षिरसागर यांचाही बंगला पेटवण्यात आला आहे. तसेच संतप्त आंदोलकांनी बीडमधील राष्ट्रवादी काँग्रेसचं कार्यालयही आगीच्या हवाली केलं आहे.
राज्यात हिंसाचार वाढत असताना राज्याचे गृहमंत्री देवेंद्र फडणवीस हे निवडणुकीच्या प्रचारासाठी छत्तीसगड दौऱ्यावर गेले आहेत. या सर्व प्रकरणावरून राष्ट्रवादी काँग्रेसचे (शरद पवार गट) आमदार रोहित पवार यांनी देवेंद्र फडणवीसांवर टीका केली. महाराष्ट्र जळत असताना तुम्ही गृहमंत्री असूनही इतर राज्यात निघून जाता, याचा अर्थ या जाळपोळीच्या घटनांची तुम्ही अप्रत्यक्षरित्या पाठराखण करता, असं आम्ही समजायचं का? असा सवाल रोहित पवरांनी विचारला.
हेही वाचा- VIDEO: मराठा आंदोलकांनी राष्ट्रवादीच्या आमदाराचं घर पेटवलं, वाहनं जाळली
आमदार रोहित पवार यांनी’एक्स’वर (पूर्वीचे ट्विटर) देवेंद्र फडणवीसांच्या काही ट्वीट्सचे स्क्रीनशॉट्स शेअर केले आहेत. संबंधित पोस्टमध्ये रोहित पवार म्हणाले, “आज सामाजिकदृष्ट्या महाराष्ट्र होरपळतोय… पण ही आग विझवण्याचं सोडून आपले गृहमंत्री छत्तीसगड भाजप राजकीय आगीत खाक होऊ नये, याची काळजी घेण्यासाठी महाराष्ट्र वाऱ्यावर सोडून तिकडं जातात. कधी कोणत्या गोष्टीला प्राधान्य द्यायचं, हे देवेंद्र फडणवीस यांच्यासारख्या नेत्याला नक्कीच कळत असणार… तरीही महाराष्ट्र जळताना तो शांत करण्याऐवजी तुम्ही इतर राज्यात जाऊच कसं शकतात?”
“एकीकडे मनोज जरांगे पाटील शांततेचं आवाहन करत आहेत. पण गृहमंत्री असूनही महाराष्ट्र जळत असताना तुम्ही इतर राज्यात निघून जाता. याचा अर्थ या जाळपोळीच्या घटनांची तुम्ही अप्रत्यक्षरीत्या पाठराखण करता, असं आम्ही समजायचं का?” असा सवाल रोहित पवारांनी उपस्थित केला.
