“संभाजी भिडेंचा भाजपाशी संबंध…”, शिंदे गटाच्या नेत्याचं थेट विधान

यावर आता शिंदे गटाचे प्रवक्ते दीपक केसरकर यांनी प्रतिक्रिया दिली आहे. संभाजी भिडे हे स्वतंत्र आहेत. त्यांचा कुठल्याही पक्षाशी संबंधित नाहीत. भाजपाशी त्यांचा संबंध जोडणं योग्य नाही. गृहखात्याकडून त्यांचं विधान तपासून बघितलं जाईल आणि त्यानंतर योग्य तो निर्णय घेतला जाईल, अशी प्रतिक्रिया दीपक केसरकर यांनी दिली. ते प्रसारमाध्यमांशी संवाद साधत होते.

हेही वाचा- “संभाजी भिडे फक्त सोंगाड्या, हे सगळं टूलकिट…”, महात्मा गांधींचे पणतू तुषार गांधींचा गंभीर आरोप!

संभाजी भिडे यांनी केलेल्या वादग्रस्त विधानावर भाष्य करताना दीपक केसरकर म्हणाले, “संभाजी भिडे हे स्वतंत्र आहेत. ते कुठल्याही पक्षाशी संबंधित नाहीत. त्यांची एक वेगळी संघटना आहे. ती संघटना मुलांना गडावर घेऊन जाते. मुलांना छत्रपती शिवाजीमहाराजांबद्दल माहिती देते. हे सगळं काम त्यांच्या संघटनेकडून स्वतंत्रपणे केलं जातं. त्यामुळे त्यांचा भाजपाशी संबंध जोडणं योग्य नाही. गृहखातं या प्रत्येक गोष्टीकडे लक्ष ठेऊन असतं. गृहखातं अशा घटनांवर आवश्यक ते निर्णय घेतं. गृहखात्याकडून आधी असं वक्तव्य तपासून बघितलं जातं आणि मग त्यावर योग्य तो निर्णय घेतला जातो.”

हेही वाचा- पक्ष सोडून गेलेल्या नेत्यांना उद्धव ठाकरेंचा इशारा; म्हणाले, “एवढीच अपेक्षा आहे की…”

संभाजी भिडे नेमकं काय म्हणाले?

अमरावतीच्या बडनेरामध्ये झालेल्या कार्यक्रमात संभाजी भिडेंनी महात्मा गांधींच्या वडिलांविषयी वादग्रस्त विधान केलं. “मोहनदास हे करमचंद गांधी यांच्या चौथ्या पत्नीचे पुत्र होते. करमचंद हे ज्या मुस्लीम जमीनदाराकडे कामाला होते, त्याच जमीनदाराची मोठी रक्कम चोरून ते पळून गेले होते. त्यामुळे त्या चिडलेल्या मुस्लीम जमीनदाराने करमचंद यांच्या पत्नीलाच पळवून घरी आणले. त्यांच्याशी पत्नीसारखा व्यवहार केला. त्यामुळे करमचंद गांधी हे मोहनदास यांचे खरे वडील नसून ते त्याच मुस्लीम जमीनदाराचे पुत्र आहेत. मोहनदास यांचा सांभाळ व शिक्षणही त्याच मुस्लीम पालकाने केले”, असं संभाजी भिडे म्हणाले.