भारतीय महसूल सेवा ( आयएरएस ) अधिकारी समीर वानखेडे आणि अन्य चौघांविरोधात सीबीआयने भ्रष्टाचार प्रतिबंधक कायद्याअंतर्गत गुन्हा दाखल केला आहे. अभिनेता शाहरूख खान याचा मुलगा आर्यन याच्या अटकेआधी २५ कोटी रुपयांची खंडणी मागितल्याच्या आरोपावरून हा गुन्हा दाखल केला आहे. याप्रकरणी ‘सीबीआय’ने मुंबईसह २९ ठिकाणी छापे टाकल्याचं सांगितलं जात आहे. यावरून शिवसेना ( ठाकरे गट ) खासदार संजय राऊत यांनी भाजपावर सडकून टीका केला आहे. ते प्रसारमाध्यमांशी बोलत होते.
“समीर वानखेडे हे आरएसएसच्या मुख्यालयात जाऊन आले आहेत. भाजपात ते प्रवेश करणार होते. भाजपा त्यांच्या समर्थनार्थ ‘We Support Sameer Wankhede’ असे फलक घेऊन रस्त्यावर उतरली होती. त्याप्रकरणात नवाब मलिकांना गुन्हेगार ठरवण्यात आलं. पण, आज सत्य काय समोर आलं आहे. ‘सीबीआय’ने वानखेडेंवरती गुन्हा दाखल केला असून, अटक होऊ शकते. कदाचीत ईडीकडूनही वानखेडेंची चौकशी होऊ शकते,” असा दावा संजय राऊतांनी केला.
“भाजपा पदाधिकाऱ्याच्या घरात एनबीसीतील चोरमंडळाच्या बैठका”
“राजकारण किंवा प्रशासनातील चोर आणि लफग्यांना भाजपा समर्थन देते. आता भाजपाचं काय मत आहे? वानखेडेंना बढती मिळावी यासाठी मुंबई भाजपातील एक स्वयंघोषित नेता दिल्लीत वशिला लावत होता. भाजपा पदाधिकाऱ्याच्या घरात एनबीसीतील चोरमंडळाच्या बैठका होत होत्या. सगळी खंडणी तिथे गोळा होत असायची. हे खरं आहे की नाही, हे भाजपाच्या नेत्यांने सांगावं,” असा आरोपही संजय राऊतांनी केला आहे.
हेही वाचा : “राहुल नार्वेकरांनी विधानसभा अध्यक्षांसारखं वागावं, ते जर…”, संजय राऊतांनी ठणकावलं
“नवाब मलिकांना आरोपीच्या पिंजऱ्यात उभं केलं”
“तुम्ही देशाला कुठे घेऊन जात आहात. खुनी-दरोडेखोर आणि खंडणीखोर अशा प्रशासनातील अधिकाऱ्यांना तुम्ही डोक्यावर घेऊन नाचत होता. नवाब मलिकांना आरोपीच्या पिंजऱ्यात उभं केलं. याचा अर्थ नवाब मलिकांवरील सर्व आरोप खोटे आहे. हे आज समजतंय,” असेही संजय राऊतांनी म्हटलं.
