शिवसेनेचे खासदार संजय राऊत यांची नुकतीच जामिनावर सुटका झालेली आहे. पत्राचाळ घोटाळ्याप्रकरणी ते मागील साधारण तीन महिन्यांपासून तुरुंगात होते. दरम्यान, बाहेर आल्यानंतर त्यांनी तुरुंगात घालवलेल्या दिवसांवर भाष्य केले आहे. कोणावरही तुरुंगात जाण्याची वेळ येऊ नये. तुरुंगातील दिवस फार कठीण असतात, असे संजय राऊत म्हणाले आहेत. तसेच मी तुरुंगात गेलो म्हणजे लढाई संपलेली नाही, असेदेखील संजय राऊतांनी ठणकावून सांगितले. ते ‘एबीपी माझा’ने आयोजित केलेल्या एका विशेष कार्यक्रमात बोलत होते.
“काही लोक दोन-दोन वर्षांपासून तुरुंगात आहेत. अनिल देशमुख हे तर दीड वर्षांपासून तुरुंगात आहेत. मला सारखं वाटतं की त्यांचा दोष नाहीये. सरकारने बनवलेल्या विशेष कायद्याचा गैरवापर सुरू आहे. कायद्याच्या राजकीय गैरवापरामुळे अनेक लोक तुरुंगात आहेत. ब्रिटिशांच्या काळातही अशा प्रकारचे कायदे नव्हते,” असे संजय राऊत म्हणाले.
“तुरुंगातील एक-एक तास शंभर दिवसांचा असतो. तुम्ही कितीही मोठे असले तरी तुरुंगात कोणत्याही सुविधा दिल्या जात नाहीत. वीर सावरकर दहा-दहा वर्षे अंदमानला कसे राहिले असतील. मंडालेमध्ये लोकमान्य टिळक कसे राहिले असतील. आणीबाणीच्या काळात अनेक नेते अडीच-अडीच महिने तुरुंगात होते. हे सगळे लोक तुरुंगात कसे राहिले असतील, याचा मी विचार करतो. तुरुंगात जाण्याची कोणावरही वेळ येऊ नये,” असे संजय राऊत म्हणाले.
“प्रत्येकाने तुरुंगात जाण्याचे टाळले पाहिजे. अनेक चांगले उद्योगपती तुरुंगात आहे. ज्यांच्याविषयी आपल्याला आदर आहे, ते लोकदेखील तुरूगांत आहेत. मी तरुंगात जाऊन आलो, म्हणजे लढाई संपलेली नाही,” असेही संजय राऊत यांनी ठणकावून सांगितले.
