“तू राहशील किंवा मी”, फडणवीसांना आव्हान देणाऱ्या उद्धव ठाकरेंकडून मुख्यमंत्र्यांचं अभिनंदन; राऊत म्हणाले, “तोफा थंडावल्या”

Sanjay Raut Press Conference Statement on Devendra Fadnavis Uddhav Thackeray Meeting : महाराष्ट्राचे माजी मुख्यमंत्री व शिवसेनेचे (उबाठा) पक्ष प्रमुख उद्धव ठाकरे यांनी मंगळवारी (१७ डिसेंबर) नवनिर्वाचित मुख्यमंत्री देवेंद्र फडणवीस यांची भेट घेतली. या भेटीची देशभर चर्चा होत आहे. काही दिवसांपूर्वी निवडणुकीच्या प्राचारादरम्यान एकमेकांवर टीका करणारे हे दोन नेते एकत्र बसून हसत चर्चा करत असल्याचं पाहून अनेकांना धक्का बसला. परंतु, हीच महाराष्ट्राची खरी संस्कृती आहे असं हे दोन्ही नेते म्हणाले. दरम्यान, उद्धव ठाकरे यांनी काही दिवसांपूर्वी देवेंद्र फडणवीस यांच्यावर केलेल्या एका टीकेवरून त्यांना प्रश्न विचारला जात आहे. उद्धव ठाकरे यांनी ३१ जुलैच्या दिवशी मुंबईतील रंगशारदा सभागृहात एक मेळावा घेतला होता. या मेळाव्यात ते म्हणाले होते, “मला आणि आदित्यला तुरुंगात टाकण्यासाठी देवेंद्र फडणवीस डाव आखत होते. मात्र मी सगळं काही सहन करुन उभा राहिलो आहे. आता एक तर तू राहशील किंवा मी राहीन. गीतेमध्येही हेच आहे. अर्जुनाने पाहिलं की त्याच्यासमोर त्याचे नातेवाईकच उभे आहेत तेव्हा त्यालाही यातनाच झाल्या होत्या. मलाही यातना होत नसतील का?”