Sanjay Shirsat : “वाघांच्या कळपात या”, ठाकरे गटाच्या बड्या नेत्याला शिंदे गटाच्या नेत्याची ऑफर; म्हणाले, “महिनाभरात…”

संजय शिरसाट काय म्हणाले?

भास्कर जाधव यांनी दोन दिवसांपूर्वी एक व्हॉट्सॲप स्टेट्‍स ठेवलं होतं. त्यांच्या स्टेटस संदर्भात आज पत्रकार परिषदेत संजय शिरसाट यांना प्रश्न विचारण्यात आला. यावेळी शिरसाट म्हणाले, “भास्कर जाधव यांच्या स्टेटसचा अर्थ काय? हे तुम्ही समजून घ्या. त्यांचा म्होरक्या धाडसी नाही, हे त्यांना सांगायचं आहे हे भास्कर जाधव म्हणतात मी नाही. त्यामुळे भास्कर जाधवांची मानसिकता झाली आहे की त्यांच्याबरोबर (ठाकरेंबरोबर) काम करणं अशक्य आहे. याबाबत त्यांनी अनेकदा सुचवलं आहे. मात्र, त्यांना काही लोक विनवण्या करत आहेत. त्या लोकांचं भास्कर जाधव ऐकणार नाहीत”, असं संजय शिरसाट यांनी म्हटलं आहे.

‘महिनाभरात मोठे बदल होतील’

“भास्कर जाधव माझे मित्र आहेत, मला त्यांचा स्वभाव माहिती आहे. ते एकदा घेतलेल्या निर्णयापासून मागे हटणार नाहीत. त्यांचा त्यांच्या म्होरक्यावर विश्वास राहिला नाही. निर्णय घेण्यासाठी प्रक्रिया असते, त्यामुळे त्यासाठी थोडासा वेळ लागतो. मी तुम्हाला खात्रीने सांगतो की पुढील महिनाभरात अधिवेशनात फार मोठे बदल झालेले दिसतील”, असा मोठा दावा संजय शिरसाट यांनी केला.

‘आता वाघांच्या कळपात या…’

“भास्कर जाधव यांच्यासारखा चांगला आमदार म्हणजे ते अभ्यासू आहेत, स्पष्ट बोलणारे आहेत. त्यामुळे त्यांना माझं सांगणं आहे की मेंढ्याच्या कळपात राहण्यापेक्षा आता वाघांच्या कळपात या”, असं सूचक विधान करत संजय शिरसाट यांनी भास्कर जाधव यांना पक्षात येण्याची ऑफरच दिली आहे. संजय शिरसाट यांच्या या विधानामुळे ठाकरे गटात खळबळ उडाली आहे.

भास्कर जाधव यांनी काय स्टेट्‍स ठेवलं होतं?

ठाकरे गटाचे नेते भास्कर जाधव यांनी दोन दिवसांपूर्वी एक व्हॉट्सॲप स्टेट्‍स ठेवलं होतं. ‘म्होरक्या जिद्दी व धाडसी असेल तर माणसंच काय जनावरं सुद्धा विश्वास ठेवतात’, अशा आशयाचं स्टेट्‍स भास्कर जाधव यांनी ठेवलं होतं. त्यांच्या या स्टेट्‍सची राजकीय वर्तुळात मोठी चर्चा रंगली. यावरून भास्कर जाधव यांच्या मनात नेमकं काय चाललंय? याबाबत राजकारणात उपस्थित करण्यात आले.