सातारा : कराडला पाणीपुरवठ्यासाठी जुन्या पुलावरून जलवाहिनी

पुणे- बंगळुरू महामार्गाच्या रुंदीकरण कामात कराडच्या कोयना पुलालगत नवा पूल उभारण्याच्या कामासाठी भराव घालून काम सुरु होते. त्यात भरावामुळे चिंचोळा झालेला नदीचा प्रवाह आणि पावसाच्या पाण्याच्या दाबामुळे येथील कराड शहराला पाणीपुरवठा करणारी जलवाहीनीच वाहून गेल्याने कराडकरांचे पाण्यासाठी हाल झाले. त्यावर तात्पुरता पर्याय झाला असलातरी हा प्रश्न कायम मार्गी लागावा म्हणून स्थानिक लोकप्रतिनिधी, प्रशासन, महामार्ग सुसज्जीकरण ठेकेदार आणि महाराष्ट्र जीवन प्राधिकरण यांचे प्रयत्न सुरु होते.

हेही वाचा – सातारा : जोरधार आठव्या दिवशीही सुरूच; कोयनेचा धरणसाठा ७१ टीएमसी; रस्ते खचले, बंधारेही वाहून गेले

दरम्यान, सध्याच्या जुन्या जॅकवेलमधून कराड शहराला पूर्ण क्षमतेने व पुरेसा पाणीपुरवठा होत नसल्याने हा पाणीपुरवठा कायम ठेवताना पर्याय म्हणून जुन्या कोयना पुलावरून जलवाहिनी टाकून पाणीपुरवठा पूर्ण क्षमतेने करण्याचे नियोजन करण्यात आले आहे. सदर कामासाठी प्रत्यक्ष जलवाहिन्या दाखल झाल्या आहेत.

हेही वाचा – “बेटा अजित कितना खाया? सरदार ७० हजार कोटी”; विजय वडेट्टीवारांची पंतप्रधान मोदी आणि अजित पवारांवर टीका

महामार्गावर कोयना पुलानजीक असलेल्या पलाश मंगल कार्यालयासमोरून ही जलवाहिनी जोडून ती जुन्या पुलावरून डाव्या बाजूने जॅकवेलपर्यंत टाकण्यात येणार आहे. साधारण हे काम सात दिवसांत केले जाणार असल्याने कराड शहराचा पाणीपुरवठा पूर्ण क्षमतेने होण्यास मदत होईल असा विश्वास दिला जात आहे.