मुंबईत शाळा १ डिसेंबरला सुरू होणार नाहीत; पुणे-नाशिकमध्येही निर्णय लांबणीवर! Omicron चा फटका

मुंबईत १५ डिसेंबरपासून शाळा सुरू

राज्य सरकारने १ डिसेंबरपासून शाळा सुरू करण्याचा निर्णय घेतला असला, तरी स्थानिक पातळीवरील परिस्थिती पाहून निर्णय घेण्याचे अधिकार स्थानिक प्रशासनाला देण्यात आले आहेत. त्यानुसार मुंबई महानगर पालिकेने १ डिसेंबरपासून शाळा सुरू न करण्याचा निर्णय घेतला आहे. मुंबई पालिकेच्या हद्दीतील शाळा आता १५ डिसेंबरपासून सुरू होणार आहेत.

पुण्यातही हीच परिस्थिती

दरम्यान, मुंबई महानगर पालिकेप्रमाणेच पुणे महानगर पालिकेने देखील १ डिसेंबरपासून शाळा सुरू न करण्याचा निर्णय घेतला आहे. “यासंदर्भात सविस्तर विचार करून निर्णय घ्यावा लागेल. याबाबत महापालिका क्षेत्रातील पालक संघटनांशी चर्चा करूनच निर्णय घेऊ”, असं पुणे महानगर पालिकेचे महापौर मुरलीधर मोहोळ यांनी सांगितलं आहे.

नाशिकमध्ये १० तारखेपर्यंत निर्णय स्थगित

मुंबई-पुण्यापाठोपाठ नाशिक महानगर पालिकेच्या हद्दीतील शाळा देखील १ डिसेंबरला सुरू होणार नसल्याचं स्पष्ट झालं आहे. ओमायक्रॉनचा नवा विषाणू सापडला असून त्याचा शहरात काही परिणाम आहे किंवा नाही, हे पाहूनच याबाबतचा निर्णय घेता येईल. त्यामुळे १० डिसेंबरपर्यंत यासंदर्भातला निर्णय स्थगित करण्यात आल्याचं नाशिक महानगर पालिका प्रशासनाकडून सांगण्यात आलं आहे.