दापोली : खेड मधील भरणे नाका या ठिकाणी असलेली शामराव सहकारी पतसंस्था दिवाळखोरीत निघाली असून या पतसंस्थेत कोट्यावधी रुपयांचा भ्रष्टाचार झाल्याचा आरोप होत आहे. शेकडो ठेवीदारांचे पैसे देण्यासाठी पतसंस्थेत पैसे नाहीत असे सांगितले जात आहे.
खेड तालुक्यातील शेकडो ठेवीधारकांनी तसेच अल्पबचत खाते धारकांनी बुधवारी पतसंस्थेत जाऊन आपला संताप व्यक्त केला. शाखाधिकारी आणि संचालकांना अक्षरशः धारेवर धरून त्यांना घेराव घातला. घटनास्थळी सहकारी संस्थेचे सहाय्यक निबंधक हे देखील दाखल झाले. या पतसंस्थेत शाखाधिकारी यांनीच बनावट चलने तसेच कागदपत्रे व पावती पुस्तके तयार करून हा घोटाळा केला असल्याचे स्वतः शाखाधिकाऱ्यांनीच कबूल केले. या संस्थेचे लेखापरीक्षण सुरू केले गेले असून बनावट चलने तसेच पावती पुस्तके तयार करणाऱ्या विरोधात तक्रार देण्यासाठी शेकडो ठेवीदार आणि त्या संस्थेचे अध्यक्ष हे पोलीस ठाण्यात दाखल झाले आहेत. खेड पोलीस ठाण्यात संबंधित शाखा अधिकारी व या प्रकरणात समाविष्ट असणाऱ्यांवर गुन्हा दाखल करण्याची प्रक्रिया सुरू आहे. त्या पतसंस्थेतील ठेवीदारांनी अक्षरशः संताप व्यक्त करून संपूर्ण परिसर तणावग्रस्त केला. या पतसंस्थेतील ठेवीदारच नाही तर ज्या कर्मचाऱ्यांनी ठेवी आणल्या ते देखील आक्रमक झालेले पाहायला मिळाले.
शामराव सहकारी पतसंस्था ही सन १९८६ साली स्थापन झाली असून या पतसंस्थेची एकच शाखा असून ती शाखा भरणे येथे गेली अनेक वर्ष सुरू आहे. या पतसंस्थेत गैरव्यवहार झाल्याची चर्चा सन २०२३ पासून सुरू होती. परंतु या पतसंस्थेचे लेखापरीक्षण सुरू असून त्यानंतरच नेमके किती रुपयांचा आर्थिक गैरव्यवहार झाला हे आपल्याला समजू शकेल अशी बतावणी संस्थेच्या संचालक मंडळा कडून करण्यात आली होती. सर्व ठेवीदारांचे पैसे परत देण्यात येतील अशी माहिती पतसंस्थेच्या शाखाधिकाऱ्यांच्याकडून वेळोवेळी ठेवीदारांना दिली जात होती.
त्यामुळे असा आर्थिक गैरव्यवहार झाल्याची माहिती मिळाल्यानंतर देखील ठेवीदारांनी या संदर्भात मौन बाळगले होते. अशी माहिती येथील ठेवीदार रुपेश चव्हाण यांनी सांगितली.
या पतपेढीत वेरळ गावातील रहिवासी तसेच महाराष्ट्र नवनिर्माण सेनेचे तालुकाध्यक्ष निलेश बामणे यांनी देखील या प्रकरणात आक्रमक भूमिका घेतली असून जोपर्यंत सर्व ठेवीदारांचे पैसे मिळत नाहीत तोपर्यंत सर्व संचालकांच्या दारात ठेवेदारांसोबत आपण आंदोलन करणार असल्याचे ते म्हणाले आहे.
