शरद पवारांनी राज ठाकरेंच्या मर्मावर ठेवलं बोट; म्हणाले, “हाताच्या बोटावर मोजता येतील इतके सुद्धा…”

महाराष्ट्र नवनिर्माण सेनेचे प्रवक्ते गजानन काळे यांनी आजच शिवसेनेवर टीका करताना, “राष्ट्रवादीची उपशाखा असलेल्या नवाबसेनेनं शिवतिर्थावरील टोमणे मेळाव्यासाठी हिंदूत्वाची वचनपूर्वी असं पोस्टर लॉन्च केलं आहे. नवाब सेनेच्या नवाब प्रमुखांनी आदरणीय बाळासाहेबांची भाषणं, मुलाखती आणि पत्रकार परिषदा परत एकदा ऐकण्याची गरज आहे. त्या जर आपल्याकडे नसतील तर आम्ही त्या तुमच्याकडे पाठवू. सत्तेत आल्यावर हिंदुत्व गुंडाळून काँग्रेस, राष्ट्रवादीची लाचारी करायची व सत्ता गेल्यावर हिंदुत्वाची आरोळी ठोकायची. यांची ही भूमिका म्हणजे दुतोंडी आहे,” अशी टीका केली होती.

नक्की वाचा >> ठाकरे की शिंदे? दसरा मेळावा वादात संजय राऊतांची उडी; म्हणाले, “परवानगी मिळाली नाही तरी शिवसैनिकांनी…”

यापूर्वी मनसेकडूनही अशापद्धतीची टीका केली आहे. “मनसेकडून असा आरोप केला जातो की शरद पवारांसोबतची शिवसेना ही राष्ट्रवादीच्या प्राणीसंग्रहालयातील प्राणी आहे. अशापद्धतीची आरोप केला आहे. या राजकीय वक्तव्याकडे तुम्ही कसं पाहता?” असा प्रश्न शरद पवारांना विचारण्यात आला. या प्रश्नावर उत्तर देताना शरद पवारांनी मनसेच्या मर्मावर बोट ठेवलं. “प्राणी वगैरेसंदर्भातील उल्लेख मी काही करणार नाही. साधारणपणे हाताच्या बोटावर मोजता येतील इतके सुद्धा ज्यांना विधीमंडळात (आमदार) निवडून आणता येत नाही. त्यांच्याबद्दल काय भाष्य करायचं,” असं उत्तर शरद पवार यांनी दिलं.