शिवसेना (ठाकरे गट) खासदार संजय राऊत हे सातत्याने सत्ताधारी भाजपा आणि शिंदे गटावर टीका करताना दिसतात. तर भाजपाकडून आमदार नितेश राणे यांची संजय राऊत आणि उद्धव ठाकरेंवर टीका सुरू असते. याचदरम्यान, आमदार नितेश राणे यांनी आज (७ मे) एक मोठा दावा केला आहे. संजय राऊत १० जूनपर्यंत राष्ट्रवादी काँग्रेसमध्ये प्रवेश करणार आहेत. त्यासंदर्भात त्यांच्या बैठका देखील झाल्या आहेत आणि बोलणीही सुरु आहेत, असा दावा राणे यांनी केला.
नितेश राणे म्हणाले की, संजय राऊतांच्या राष्ट्रवादी प्रवेशाबाबतची माहिती मला सूत्रांनी दिली आहे. त्यांनी हे पण सांगितलं की तुम्ही संजय राऊत यांची शरद पवारांच्या राजीनाम्याच्या वेळीची भूमिका नीट पाहा. तसेच त्याआधीची भूमिका देखील पाहा. संजय राऊत हे सातत्याने अजित पवारांवर टीका करत आहेत. राष्ट्रवादी काँग्रेसमध्ये प्रवेश करण्यासाठी संजय राऊत यांची एक अट आहे. ती म्हणजे अजित पवारांनी पक्ष सोडला तर मी राष्ट्रवादीत प्रवेश करतो.
हे ही वाचा >> सुप्रिया सुळेंना पक्षात मोठी जबाबदारी देणार? शरद पवार म्हणाले, “एका वर्षात…”
राणे यांच्या दाव्यानंतर राजकीय चर्चा सुरू झाल्या आहेत. याचदरम्यान, राष्ट्रवादी काँग्रेस पक्षाचे सर्वेसर्वा पंढरपूरमध्ये आहेत. आज त्यांनी पंढरपुरात पत्रकार परिषद घेतली. या पत्रकार परिषदेवेळी शरद पवार यांना माध्यमांच्या प्रतिनिधींनी नितेश राणेंच्या दाव्याबद्दल विचारलं असता. शरद पवार म्हणाले, कोणीतरी सिरियस (महत्त्वाचं) बोलण्यात ज्यांचा लौकीक आहे अशा लोकांना उत्तर द्यावं. या पोरासोरांच्या वक्तव्यावर काय बोलणार.
