पालिका निकालाने रायगडमध्ये शहरी भागात सेनेचा शिरकाव

शिवसेनेचा जोर वाढत असताना राष्ट्रवादी काँग्रसेची मात्र पीछेहाट झाली. मुरुड आणि माथेरानसारख्या नगरपालिका राष्ट्रवादीला गमवाव्या लागल्या. तर खोपोली आणि रोहा नगरपालिका घेताना पक्षाला कसरत करावी लागली. निवडणुकीपुर्वी पक्षात झालेले बंडखोरी राष्ट्रवादीला महागात पडली. नगरसेवकांची संख्या ६३ वरून ३४ वर घसरली. मुरुडमध्ये तालुका अध्यक्ष मंगेश दांडेकर यांच्या एकाधिकारशाहीला कंटाळून नगराध्यक्षासह सहा नगरसेवक सेनेत दाखल झाले. खोपोलीत राष्ट्रवादीच्या महिला जिल्हाध्यक्षा अश्विनी पाटील यांनी बंडखोरी करत भाजपत प्रवेश केला. प्रदेशाध्यक्ष सुनील तटकरे यांनी रोह्य़ात प्रस्थापितांना उमेदवारी नाकारल्याने बंडखोरी उफाळून आली. विद्यमान नगराध्यक्ष समीर शेडगे यांनी अपक्ष म्हणून निवडणूक लढवून कडवी लढत दिली. सत्ता कायम राखण्यासाठी सुनील तटकरे यांना घरोघरी फिरावे लागले. तिरंगी लढतीचा फायदा राष्ट्रवादीला झाला आणि रोह्य़ात नगराध्यक्षपदाचे उमेदवार असणारे संतोष पोटफोडे अवघ्या सहा मतांनी निवडून आले.

राष्ट्रवादीशी केलेली आघाडी शेतकरी कामगार पक्षासाठी घातक ठरली. अलिबागचा अपवाद वगळता पक्षाला फारसे यश मिळाले नाही. पेण, खोपोली, उरण यांसारख्या शहरात पक्षाचे पानिपत झाले. पक्षाची ताकद असूनही आघाडीमुळे उमेदवारी न देण्याचा निर्णय शेकापसाठी अडचणीचा ठरला. खोपोली आणि पेणमध्ये शेकापचे प्रत्येकी तीन नगरसेवक निवडून आले, तर उरणमध्ये पक्षाचा एकही नगरसेवक निवडून आला नाही. मुरुडमध्ये राष्ट्रवादी काँग्रेसबद्दल असणाऱ्या नाराजीचा फटका शेकापला बसला.

उरणचा अपवाद वगळता भाजपला जिल्ह्य़ात मतदारांनी फार काही जनाधार दिला नाही. जिल्ह्य़ात भाजपचे केवळ १६ नगरसेवकच निवडून आले. उरणमध्ये बहुमत तर खोपोलीत तीन नगरसेवक वगळता अन्य सहा पालिकांमध्ये भाजपची पाटी कोरी राहिली. मडाड आणि पेणचे नगराध्यक्षपदे जिंकून काँग्रेसने ताकद कायम राखली. पेणमध्ये शेकापचा आमदार असताना काँग्रेसला मिळालेल्या यशाने शेकापला तो धक्का मानला जातो.