सातारा : सातारा जिल्ह्यातील सहा बाजार समित्यांचा राज्यातील पाहिल्या शंभर बाजार समित्यांमध्ये समावेश झाला आहे. सातारा, फलटण, लोणंद, वाई, कराड आणि पाटण या बाजार समित्यांचा यामध्ये समावेश आहे. स्मार्ट प्रकल्पांतर्गत राज्यातील बाजार समित्यांची राज्यस्तरीय क्रमवारी आज जाहीर करण्यात आली. बाळासाहेब ठाकरे कृषी व्यवसाय व ग्रामीण परिवर्तन स्मार्ट प्रकल्पांतर्गत राज्यातील ३०५ बाजार समित्यांची सन २०२३-२४ या वर्षाकरिता वार्षिक क्रमवारी प्रसिद्ध करण्यात आलेली आहे.
कोल्हापूर विभागातील एकूण २१ बाजार
राज्यातील पाहिल्या १०० क्रमवारीमध्ये कोल्हापूर विभागातील आटपाडी बाजार समिती प्रथम क्रमांकावर, फलटण बाजार समिती द्वितीय क्रमांकावर व लोणंद बाजार समिती तिसऱ्या क्रमांकावर आहे. आटपाडी बाजार समिती राज्य स्तरावर २२ व्या क्रमांकावर, फलटण बाजार समिती २४ व्या क्रमांकावर, तर लोणंद बाजार समिती २९ व्या क्रमांकावर आहे. यामध्ये बाजार समितीकडे उपलब्ध असलेल्या पायाभूत सुविधा व इतर सुविधा, बाजार समितीचे आर्थिक निकष, बाजार समितीचे वैधानिक कामकाज, इतर विशेष निकष अशा एकूण २०० गुणांपैकी मिळालेल्या गुणांच्या आधारे बाजार समित्यांची राज्यस्तरीय क्रमवारी देण्यात आली आहे. राज्याच्या पणन संचालनालयाकडून स्मार्ट प्रकल्पांतर्गत प्रकल्प अंमलबजावणी कक्ष यांच्याकडून राज्यस्तरीय क्रमवारी घोषित करण्यात आली आहे. जिल्ह्यातील फलटण, लोणंद, सातारा, वाई, कराड आणि पाटण या बाजार समित्यांचा यामध्ये समावेश आहे.
फलटण कृषी उत्पन्न बाजार समितीकडून शेतकरी, हमाल, मापाडी व इतर घटकांकरिता विधायक आणि नावीन्यपूर्ण उपक्रम राबविण्यात आले आहेत. फलटण येथील शेतकरी समस्या निवारण कक्षाचे कामकाज, कार्डिॲक ॲम्ब्युलन्स, पेट्रोल पंप आणि शेतकऱ्यासाठी अल्प दरात जेवण यामुळे फलटण कृषी उत्पन्न बाजार समितीचे कामकाज लोकाभिमुख राहिले आहे. यामध्ये बाजार समितीचे सभापती, उपसभापती, सचिव, सर्व संचालक मंडळ व बाजार समितीचे अधिकारी व कर्मचारी यांचा सहभाग अतिशय महत्त्वाचा आहे.
