“मीच वारसदार, दुसऱ्या कुणाला महत्त्व नाही ही वृत्ती असेल तर..”, स्मिता ठाकरेंचा उद्धव ठाकरेंना टोला

उद्धव ठाकरे उत्तम फोटोग्राफर

उद्धव ठाकरे हे राजकारणात नव्हते. सर्वात आधी राजकारणात राज ठाकरेच आले होते. राज ठाकरेंनी बाळासाहेब ठाकरेंची शैली आत्मसात केली होती. राज ठाकरे राजकारणात आले, मोठे झाले तोपर्यंत उद्धव ठाकरे फोटोग्राफर झाले. एक दिवस अचानक उद्धव ठाकरेंनाही वाटू लागलं की मलाही राजकारणात यायचं आहे. ते राजकारणात आले, त्यामागची कारणं मला माहीत नाहीत. पण ते आले हे काही वाईट झालं नाही. पण पुढे जे काही घडलं तिथे काय बिघडलं ते मला माहीत नाही. असं स्मिता ठाकरे म्हणाल्या आहेत.

मी राजकारणात येण्याचा हट्ट धरला नाही

उद्धव आणि राज हेच राजकारणात होते. मी तेव्हा राजकारणात तेव्हाही नव्हते आणि आजही नाही. मी राजकारणात येण्याचा हट्टही धरला नाही. मी शिवसेनेत आहे असंही मी कुणाला सांगत नसे. बाळासाहेबांनी मला कायमच चांगली शिकवण दिली. त्यांनी मला राजकारणाच्या बाहेर ठेवलं नाही. बाळासाहेब ठाकरेंचा खूप चांगला सहवास मला मिळाला. त्यांनी मला राजकारण आणि समाजकारण या दोन्हींसाठी मार्गदर्शन केलं.

मीच वारसदार अशी वृत्ती असेल तर

“शिवसेनेची जी काही अवस्था झाली आहे ती पाहून बाळासाहेब ठाकरेंच्या आत्म्याला यातना होत असतील. राज ठाकरे आणि उद्धव ठाकरे हे जेव्हा एकमेकांपासून वेगळे होत होते तेव्हा मी त्या दोघांना थांबवण्याचा, समजावण्याचा खूप प्रयत्न केला. मात्र काही गोष्टी खूप खोलवर गेलेल्या असतात, ज्या मनात राहतात. तसंच अनेकदा काहींचे उद्देश असेच असतात की आम्हीच वारसदार आहोत. ही वृत्ती ज्याच्या डोक्यात आहे तोच स्वतःला वारसदार म्हणवतो. मग इतर लोकांचं महत्व त्यांना राहात नाही. अशा वृत्तीने कुणी चालणार असेल तर पक्ष एकसंध कसा राहिल?” असं स्मिता ठाकरे म्हणाल्या आहेत.

हे पण वाचा- “राज आणि उद्धव वेगळे होऊ नयेत म्हणून मी खूप प्रयत्न केले, आज बाळासाहेब…”, स्मिता ठाकरेंचं वक्तव्य

बाळासाहेब आणि उद्धव ठाकरे यांच्या नात्यात दुरावा आला होता का?

“माँ (मीनाताई ठाकरे) जेव्हा गेल्या तेव्हा बाळासाहेब ठाकरे खूप भावनिक झाले होते. मी तेव्हा त्यांच्याबरोबर होते. उद्धव ठाकरे आणि बाळासाहेब ठाकरे यांच्यात काय झालं ते मला माहीत नाही. आम्ही (मी आणि बाळासाहेब) या विषयावर कधी बोललोही नाही. मी कायम त्यांच्याकडून जितकं चांगलं शिकता आलं तेवढं मी शिकले. माझं आणि त्यांचं नातं गुरु शिष्याचं आहे. मी आज जे काही शिकले आहे ते सगळं बाळासाहेबांमुळेच शिकले आहे.”