अहिल्यानगर : राज्य सरकारने ‘आपले सरकार सेवा केंद्रां’ची (सेतू केंद्र) संख्या दुप्पट करण्याचा निर्णय घेतानाच या सेवा केंद्रातून देण्यात येणाऱ्या सेवांच्या दरातही वाढ केली आहे. याशिवाय घरपोच सेवा देण्यासाठी १०० रुपये अतिरिक्त अकारण्याचा निर्णय घेतला आहे.
राज्य सरकारच्या सामान्य प्रशासन विभागाने या संदर्भातील निर्णय जाहीर केला आहे. यापूर्वी सन २०१८ मध्ये आपले सरकार सेवा केंद्र स्थापन करण्यासाठी निकष ठरवण्यात आले होते. साडेसहा वर्षांनंतर त्यामध्ये बदल करण्यात आला आहे. लोकसंख्येत झालेल्या वाढीच्या पार्श्वभूमीवर आपले सरकार सेवा केंद्राच्या संख्येत वाढ करण्याचा व त्यांच्या स्थापनेसाठी असलेल्या निकषात बदल करण्यात आला आहे. त्याचबरोबर सेवा केंद्रातून देण्यात येणाऱ्या सेवा शुल्कातही वाढ करण्यात आली आहे. आता ३३.६० रुपयांऐवजी ५० रुपये आकारले जाणार आहेत. आपले सरकार सेवा केंद्रामार्फत ४२० प्रकारच्या दाखल्यांच्या सेवा दिल्या जातात.
अहिल्यानगर जिल्ह्यात सध्या १ हजार २४२ ग्रामपंचायती, १३ महाविद्यालये व जिल्हाधिकारी कार्यालयामार्फत ८२८ असे एकूण २०८३ आपले सरकार सेवा केंद्र स्थापन झाले आहेत. ग्रामपंचायतीमध्ये आपले सरकार सेवा केंद्र चालवण्याची जबाबदारी ऑपरेटरवर देण्यात आली आहे. त्यांच्याकडेच त्यासाठीचे ‘आयडी’ देण्यात आले होते, मात्र ग्रामपंचायतीऐवजी हे ऑपरेटर बाहेरच ‘आयडी’चा वापर करत असल्याने आता ग्रामपंचायतीच्या नावानेच आयडी दिले जाणार आहेत. या संदर्भातील आदेशही जारी करण्यात आला आहे. जिल्ह्यात आता १ हजार २३४ ग्रामपंचायतींमधून आपले सरकार सेवा केंद्र सुरू केले जातील.
आपले सरकार सेवा केंद्र दुप्पट करण्याच्या निर्णयाची अंमलबजावणी जिल्हाधिकारी, जिल्हा गव्हर्नन्स सोसायटी व जिल्हा सेतू समितीने ३० दिवसात करावेत असेही आदेश देण्यात आले आहेत. ५० रुपये शुल्क करण्यात आल्यानंतर त्यामध्ये राज्य सेतू केंद्रांचा वाटा ५ टक्के, महाआयटीचा वाटा २० टक्के, जिल्हा सेतू सोसायटीचा वाटा १० टक्के तर आपले सरकार सेवा केंद्र चालकाचा वाटा ६५ टक्के राहणार आहे. आपले सरकार सेवा केंद्र चालकांकडून सेवांचे दर वाढवण्याची मागणी करण्यात आली होती, त्याचा विचार करून सध्याच्या सेवा दरात सुधारणा करण्यात आल्याचे आदेशात नमूद करण्यात आले आहे.
लोकसंख्येचा निकष
नवीन निकषानुसार प्रत्येक ग्रामपंचायत क्षेत्रात २ आपले सरकार सेवा केंद्र स्थापण्यात येईल, मात्र ५ हजारपेक्षा अधिक लोकसंख्या (२०११ च्या जनगणनेनुसार) असलेल्या ग्रामपंचायतीत किमान ४ केंद्र स्थापन करण्यात येईल. शहरी भागांतील केंद्रासाठी महापालिका व नगरपरिषद येथील १० हजार लोकसंख्येसाठी दोन केंद्र, प्रत्येक नगरपंचायत क्षेत्रात किमान २ केंद्र स्थापन करण्यात येईल, मात्र ५ हजारपेक्षा अधिक लोकसंख्या असलेल्या नगरपंचायतीत किमान ४ केंद्र स्थापन करण्यात येणार आहेत. या निकषात आवश्यकतेप्रमाणे बदल करण्यात येतील.
घरपोच सेवेसाठी १०० रुपये अतिरिक्त
आपले सरकार सेवा केंद्रांतर्गत नागरिकांना त्यांच्या मागणीनुसार आपले सरकार पोर्टलवर प्रत्येक घरपोच सेवेच्या नोंदणीसाठी १०० रुपये (कर वगळून) शुल्क निश्चित करण्यात आले आहे. हे शुल्क आपले सरकार सेवा केंद्र चालकांमार्फत नागरिकांकडून गोळा करण्यात येईल. त्यामध्ये महाआयटी सेवादराचा वाटा २० टक्के तर आपले सरकार सेवा केंद्रचालकाचा वाटा ८० टक्के असेल. या दराव्यतिरिक्त प्रति अर्ज रुपये ५० रुपयाप्रमाणे अर्जदाराकडून सेवाशुल्क घेण्यात येईल.
