VIDEO: भगव्या मोर्चानंतर संगमनेरमध्ये दोन गटात दगडफेक, गाड्यांची तोडफोड आणि मारहाणीचे प्रकार, पोलीस म्हणाले…

संगमनेरमधील भगवा मोर्चावरून परतत असताना ही घटना घडली. घटनेची माहिती मिळताच जिल्हा पोलीस प्रमुख राकेश ओला, अप्पर पोलीस अधीक्षक स्वाती भोर, डी. वाय. एस. पी. सोमनाथ वाकचौरे, पोलीस निरीक्षक भगवान मथुरे यांनी घटनास्थळी धाव घेतली. यानंतर पोलिसांनी जमावाला शांत केले. तसेच जखमींना उपचारासाठी रुग्णालयात दाखल करण्यात आले.

समनापुरात मोठा पोलीस बंदोबस्त तैनात

या घटनेनंतर समनापुरात तणावपूर्ण शांतता असून मोठा पोलीस बंदोबस्त तैनात करण्यात आला आहे. पोलिसांनी हे कृत्य करणाऱ्यांवर कडक कारवाई करण्यात येणार असल्याचे सांगितले आहे.

“समनापूरमध्ये समाजकंटकांनी १-२ गाड्यांच्या काचा फोडल्या”

या घटनेवर प्रतिक्रिया देताना पोलीस अधीक्षक राकेश ओला म्हणाले, “संगमनेरमध्ये एक मोर्चा होता. तो मोर्चा दुपारी १२ वाजता संपला. त्यानंतर लोक आपआपल्या घरी परत जात असताना संगमनेरपासून ५-६ किलोमीटर अंतरावरील समनापूर गावात काही समाजकंटकांनी १-२ गाड्यांच्या काचा फोडल्या. त्यात काही लोक जखमी झाले.”

हेही वाचा : अहमदनगरमधील दंगलीवरून शरद पवारांचा हल्लाबोल, म्हणाले, “धर्माच्या नावाने…”

“दोषींवर कडक कारवाई केली जाईल”

“या प्रकरणातील दोषींचे फोटो आमच्याकडे आले आहेत. त्यांच्यावर कडक कारवाई केली जाईल. आता समनापूरमध्ये शांतता आहे. कुणीही अफवा पसरवू नये. या प्रकरणात आमचा तपास सुरू आहे,” असंही राकेश ओला यांनी नमूद केलं.