Supriya Sule on Jay Pawar Engagment Ceremony : महाराष्ट्राचे उपमुख्यमंत्री तथा पुण्याचे पालकमंत्री अजित पवार यांचे धाकटे चिरंजीव जय प”वार हे लवकरच विवाहबंधनात अडकणार आहेत. त्याआधी त्यांचा साखरपुडा निश्चित झाला असून या साखरपुड्याच्या निमित्ताने पवार कुटुंब एकत्र येणार आहे. या साखरपुड्याचं निमंत्रणही शरद पवार आणि सुप्रिया सुळे या कुटुंबाला मिळालं असून ते या सोहळ्याला उपस्थित राहतात का हे पाहणं महत्त्वाचं ठरणार आहे.
२०२३ मध्ये राष्ट्रवादी काँग्रेस पक्षात अजित पवारांनी बंड केल्यानंतर पवार कुटुंबात वितुष्ट निर्माण झालं होतं. दोन्ही कुटुंबात वाद निर्माण झाल्याने सार्वजनिक ठिकाणी अजित पवार आणि शरद पवार कुटुंबाने एकत्र येणं टाळलं होतं. त्यातच, लोकसभा आणि विधानसभा निवडणुकीच्या निमित्ताने दोन्ही नेत्यांनी आणि त्यांच्या समर्थकांनी एकमेकांवर तुफान टोलेबाजी केली होती. यामुळे राजकीय मतभेद टोकाला पोहोचले होते.
दरम्यान, दोन्ही कुटुंबातील वितुष्ट संपून पुन्हा ते एकत्र येतील की नाही याबाबतीत शंका व्यक्त केली जात असतानाच पवार कुटुंबात आता सनई चौघडे वाजणार आहेत. त्यानिमित्ताने राजकीय मतभेद दूर सारून हे कुटुंब एकत्र येण्याची शक्यता आहे. दरम्यान, यावरून जय पवार यांच्या आत्या आणि बारामती लोकसभा मतदारसंघाच्या खासदार सुप्रिया सुळे यांनी प्रतिक्रिया दिली आहे. त्या माध्यमांशी बोलत होत्या.
“मला सुनेत्रा वहिनींचा फोन आला होता. मला आमंत्रण दिलं आहे. अर्थातच आमंत्रण दिल्यावर जाणारच. सदानंद सुळे, सुप्रिया सुळे आणि रेवती सुळे जाणार आहेत. बाकीच्याचं मला माहीत नाही”, असं म्हणत त्यांनी शरद पवार जाणार की नाही याबाबतीत कोणतीही अधिकृत माहिती दिली नाही.
अजित पवारांची होणार सून ऋतुजा पाटील कोण आहेत?
अजित पवारांचे धाकटे चिरंजीव जय पवार यांचं लग्न ऋतुजा पाटीलशी होणार आहे. त्या फलटण येथील प्रवीण पाटील यांच्या कन्या आहेत. प्रवीण पाटील हे सोशल मीडिया कंपनी सांभाळतात. ऋतुजा पाटील या उच्चशिक्षित आहेत. मागच्या काही वर्षांपासून ऋतुजा पाटील आणि जय पवार यांची ओळख आहे. ऋतुजा पाटील यांची बहीण केसरी ट्रॅव्हल्सच्या केसरी पाटील यांची सून आहेत.
