शिवसेनेच्या ठाकरे गटाच्या उपनेत्या सुषमा अंधारे यांनी मराठा आरक्षणाच्या मुद्द्यावर उपमुख्यमंत्री देवेंद्र फडणवीस आणि वकील गुणरत्न सदावर्ते यांच्या भूमिकांवरून जोरदार शाब्दिक हल्ला केला. “देवेंद्र फडणवीस त्यांचा आणि गुणरत्न सदावर्तेंचा संबंध नाही म्हणतात, पण सदावर्ते ‘आय लव्ह यू फडणवीसजी'”, असं म्हणत असल्याची टीका केली.
सुषमा अंधारे म्हणाल्या, “उद्धव ठाकरे मुख्यमंत्री असताना या राज्यात एकही जमावाकडून हत्या करण्याची घटना घडली नाही. उद्धव ठाकरेंच्या काळात एकही जातीय-धार्मिक दंगल घडली नाही. सध्या ज्या पद्धतीचं राजकारण सुरू आहे त्यात विचार करा की, एकीकडे देवेंद्र फडणवीस होय आम्ही आरक्षण देणार आहोत असं म्हणतात.”
“‘आय लव्ह यू फडणवीसजी’, असं सदावर्ते म्हणत आहेत”
“दुसरीकडे फडणवीसांचाच चेला असलेले गुणरत्न सदावर्ते म्हणतात की, श्रद्धेय देवेंद्र फडणवीसांना काय ते माहिती आहे, मी आरक्षण मिळू देणार नाही. फडणवीस सांगतात की, त्यांचं आणि सदावर्तेंचा काही संबंध नाही आणि सदावर्ते श्रद्धेय फडणवीस म्हणतात. फडणवीस आमचं श्रद्धास्थान आहे, ‘आय लव्ह यू फडणवीसजी’, असं सदावर्ते म्हणत आहेत,” अशी टीका सुषमा अंधारे यांनी केली.
हेही वाचा : “ललित पाटीलचा एन्काऊंटर होऊ शकतो, कारण…”; सुषमा अंधारेंचा गंभीर आरोप, म्हणाल्या…
“…उसने इसे ठुकरा दिया फुटबॉल समझकर”
“म्हणजे एकूण सगळा खेळ जर बघितला तर आपल्या लक्षात येतंय की, इसने उसे दिल दिया दिलदार समझकर, उसने इसे ठुकरा दिया फुटबॉल समझकर. असा यांचा सगळा खेळ चालू आहे,” असा टोलाही सुषमा अंधारे यांनी फडणवीस-सदावर्तेंना लगावला.
