बॉलिवूड कलाकार मोठ्या उत्साहात नाताळ साजरा करतात. बॉलिवूड कलाकारांनी यंदादेखील कुटुंब आणि मित्र परिवाराबरोबर नाताळ सण साजरा केला आणि त्यांचे फोटो समाजमाध्यमांवर शेअर केले. पंतप्रधानांच्या निवासस्थानी २५ डिसेंबर रोजी नाताळनिमित्त खास समारंभाचं आयोजन करण्यात आलं होतं. पंतप्रधान कार्यालयाने अनेक ख्रिस्त धर्मीय कलाकार, नेते, अधिकारी आणि इतरांना या कार्यक्रमाचं निमंत्रण दिलं होतं. बॉलिवूड अभिनेता डिनो मोरियादेखील या कार्यक्रमाला उपस्थित होता. डिनोने यावेळी पंतप्रधान नरेंद्र मोदींबरोबर फोटो काढून ते समाजमाध्यमांवर शेअर केले. परंतु, या फोटोवरून शिवसेनेच्या ठाकरे गटाने भारतीय जनता पार्टीचे आमदार नितेश राणे यांना टोला लगावला आहे.
भाजपा आमदार नितेश राणे यांनी डिनो मोरियावर अनेकदा टीक केली आहे. तसेच डिनो मोरियाचा उल्लेख करून ठाकरे गटाचे आमदार आदित्य ठाकरे यांच्यावर आरोपही केले होते. नितेश राणे यांनी डिनो मोरियाला ‘मुंबई महापालिकेचा सचिन वाझे’ म्हटलं होतं. परंतु, याच डिनो मोरियाने यंदा पंतप्रधानांबरोबर नाताळ साजरा केला. ठाकरे गटाने डिनो मोरिया आणि नरेंद्र मोदींचे गप्पा मारतानाचे काही फोटो समाजमाध्यमांवर शेअर करत नितेश राणे यांना टोला लगावला आहे.
ठाकरे गटाच्या उपनेत्या आणि प्रवक्त्या सुषमा अंधारे यांनी डिनो मोरिया आणि पंतप्रधान नरेंद्र मोदी यांचा एक फोटो एक्स या मायक्रोब्लॉगिंग प्लॅटफॉर्मवर शेअर केला आहे. तसेच अंधारे यांनी म्हटलं आहे की, मला हे अजिबात आवडलेलं नाही. दर वेळेला आमच्या नितू बाळाला असं तोंडघशी पाडायचं… याचा अर्थ काय? याच डिनो मोरियावरून नितू आणि समस्त भाजपाच्या बार्किंग ब्रिगेडने किती उर बडवून घेतला होता. अंधारे यांनी पुढे ‘नकली हिंदू’ असा हॅशटॅगही वापरला आहे.
हे ही वाचा >> बच्चू कडूंना महाविकास आघाडीत आणण्यासाठी प्रयत्न करणार का? शरद पवार म्हणाले…
नितेश राणे यांनी आरोप केला होता की, डिनो मोरिया सर्वांना सांगत फिरतो की, तो मुंबई महापालिकेशी संबंधित कोणतंही काम चुकटीसरशी करू शकतो. डिनो मोरियावर अलिकडेच अंमलबजावणी संचालनालयाने कारवाई केली होती. या कारवाईनंतर नितेश राणे डिनो मोरियाविरोधात आक्रमक झाले होते. राणे म्हणाले होते मोरिया प्रकरणाची सखोल चौकशी केली तर पेंग्विन बाहेर येतील. तसेच राणे यांनी डिनो मोरियाला ;बीएमसीचा सचिन वाझे’ म्हटलं होतं.
