व्हेल माशाच्या उल्टीची (अंबरग्रीस) बेकायदा वाहतूक करणार्‍या तिघांना स्थानिक गुन्हे शाखा आणि वन विभागाने संयुक्त कारवाई करून शुक्रवारी ताब्यात घेतले. त्यांच्याकडून सुमारे साडेतीन कोटींचा मुद्देमाल जप्त करण्यात आला आहे. पुणे-बंगळूरु महामार्गाजवळील सरनोबत वाडी येथे व्हेल माशाच्या उल्टीची (अंबरग्रीस) विक्री करण्यात येणार असल्याची माहिती मिळाल्यावर स्थानिक गुन्हे शाखेचे पोलीस आणि वन विभागाच्या पथकाने सापळा लावला.
येथे व्हेल माशाची उल्टी घेऊन आलेल्या प्रदीप भालेराव, शकील शेख, आमीर पठाण या तिघांना ताब्यात घेत त्यांच्याकडून ३ कोटी ४१ लाख रुपयांची उल्टी, साडेतीन लाख रुपयांची मोटार असा सुमारे ३ कोटी ४४ लाख रुपयाचा मुद्देमाल जप्त करण्यात आला. ही कारवाई पोलीस निरीक्षक संजय गोर्ले, उपनिरीक्षक विनायक सपाटे, वन विभागाचे रमेश कांबळे, वनपाल विजय पाटील यांनी केली.
