कराड: ओगलेवाडी (ता. कराड) येथील उद्योजक (कै.) वसंत दिनकर खाडे यांचे बंद घर फोडून अज्ञात चोरट्यांनी घरातील तब्बल १०९.५० तोळे सोन्याचे दागिने व रोख दीड लाख रूपयांची रक्कम चोरटयांनी लांबवली. सोमवारी ही घटना उघडकीस आली. याबाबत प्रतीक वसंत खाडे यांनी कराड शहर पोलीस ठाण्यात फिर्याद दिली आहे. ऐन दिवाळीत घडलेल्या या घटनेने खळबळ उडाली असून, पोलिसांनी कसून तपास सुरू केला आहे.
याबाबत घटनास्थळ व पोलिसांकडून मिळालेली माहिती अशी की, करवडी फाटा (ओगलेवाडी) येथील खरेदी- विक्री संघाच्या पाठीमागे ओढयाच्या कडेला उद्योजक (कै.) वसंत खाडे यांचा साई व्हिला बंगला आहे. येथेच त्यांचे वर्कशॉप व गारमेंट आहे. (कै.) खाडे यांचे वर्षभरापूर्वी निधन झाले असून, त्यांची पत्नी, मुलगा प्रतीक व सून असे साई व्हिला बंगल्यात वास्तव्यास आहेत. दिवाळीचा सण असल्याने ३१ ऑक्टोंबर ते ६ नोव्हेंबर दरम्यान वर्कशॉप व गारमेंटमधील सर्व कर्मचाऱ्यांना सुट्टी देण्यात आली आहे. केवळ रात्र व दिवसपाळीसाठी तीन पहारेकरी (वॉचमन) त्यांच्या शिफ्टनुसार कामावर हजर होते.
हेही वाचा >>>Raj Thackeray : स्वातंत्र्यवीर सावरकरांची नात आहे राज ठाकरेंची बालमैत्रीण, म्हणाले, “आम्ही शिशूवर्गापासून…”
प्रतीक यांच्या लग्नानंतरचा हा पहिलाच दिवाळीचा सण असल्याने ते दोन नोहेंबर रोजी पाडव्याच्या दिवशी सकाळच्या सुमारास प्रतीक व त्यांच्या पत्नी असे दोघेजण पत्नीच्या माहेरी सांगली येथे गेले. त्याचदिवशी सायंकाळी सहा वाजण्याच्या सुमारास त्यांची आई हजारमाची (ता. कराड) येथील त्यांच्या माहेरी गेल्या. जाताना त्यांनी घराला कुलूप लाऊन घराची किल्ली घरकामासाठी येणाऱ्या व त्यांच्याच बंगल्यासमोरील जुन्या घरात वास्तव्यास असलेल्या महिलेकडे दिली.
दरम्यान, सोमवारी सकाळी वॉचमन बंगल्याच्या परिसरातील लाईट बंद करण्यासाठी गेल्यानंतर त्यांना वरच्या मजल्यावरील दरवाजा उघडा असल्याचे निदर्शनास आल्यानंतर बंगल्यात चोरीचा प्रकार घडल्याचे समोर आले. याबाबतची माहिती मिळताच पोलीस उपअधीक्षक अमोल ठाकूर व वरीष्ठ पोलिस निरीक्षक राजू ताशिलदार यांनी सहकारी अधिकारी व कर्मचाऱ्यांसह घटनास्थळी भेट देऊन तपासाची चक्र फिरवली. ठसे तज्ञ व श्वान पथकास पाचारण करण्यात आले होते.
बंगल्याच्या समोर असलेल्या केबिनमध्ये रात्रपाळीचा वॉचमन हजार होता. तर चोरटयांनी बंगल्याच्या पाठीमागील बाजूस दुसऱ्या व तिसऱ्या मजल्याच्या खिडकी व बाल्कनीच्या रेलींगला दोन दोऱ्या बांधल्याचे आढळून आले आहे. याच दोऱ्यांवरून चोरटयांनी वर चढून खिडकीचा गज कापून व दरवाजा तोडून घरात प्रवेश केला. तसेच घरातील कपाट उचकटून कपाटाचे लॉकर तोडून त्यातील १०९.५० तोळे सोन्याचे दागिने व दीड लाख रूपयांची रोख रक्कम लंपास केली. ऐन दिवाळीत घडलेल्या या घटनेने खळबळ उडाली आहे.
चोरटे सीसीटीव्हीत कैद
बंगल्याच्या संपुर्ण आवारात सीसीटीव्ही कॅमेरे बसवण्यात आले आहेत. चोरी करण्यासाठी आलेले दोन इसम सीसीटीव्ही कॅमेऱ्यात कैद झाले आहेत. काल तीन नोव्हेंबरला पाच ते साडेपाच वाजण्याच्या सुमारास दोन अनोळखी इसम घरात घूसल्याचे दिसत आहेत. सीसीटीव्ही कॅमेरे असल्याचे त्यांच्या लक्षात आल्यानंतर त्या इसमांनी कॅमेरावर कापड टाकले.
