सिम्बायोसिस विद्यापीठासोबत तुळजाभवानी मंदिर समितीचा करार

धाराशिव जिल्ह्यात महायुती सरकारच्या माध्यमातून तसेच मुख्यमंत्री देवेंद्र फडणवीस आणि उपमुख्यमंत्री एकनाथ शिंदे, अजित पवार यांच्या सहकार्याने अनेक महत्वाचे प्रकल्प मोठ्या गतीने पुढे जात आहेत. विविध योजना, प्रकल्प, उद्योग आणि पर्यटनाच्या माध्यमातून जिल्ह्यात ३५ हजार रोजगार निर्मिती करण्याचे उद्दिष्ट आपण डोळ्यासमोर ठेवले आहे. त्यानुसार पुढील एक-दोन वर्षात आपल्याला मोठ्या प्रमाणात कुशल मनुष्यबळ लागणार आहे. त्यासाठी स्थानिक युवकांना आधुनिक, एकात्मिक आणि व्यापक असे कौशल्य विकासाचे प्रशिक्षण देऊन कौशल्यधारीत शिक्षणाद्वारे रोजगारक्षम बनविण्यासाठी तुळजापुरात कौशल्य विकास विद्यापीठाची स्थापना करण्याची संकल्पना आपण मांडली होती. ती पूर्णत्वाला नेण्यासाठी सिम्बायोसिस कौशल्य विकास विद्यापीठ आणि तुळजाभवानी मंदिर समिती यांच्यात कौशल्य विद्यापीठ उभारणीसाठी तांत्रिक सहकार्य कराराची प्रक्रिया बुधवारी पूर्ण झाली. त्यामुळे रोजगार निर्मितीच्या दृष्टीने एक महत्वपूर्ण टप्पा आपण पूर्ण केला आहे.

तुळजापूर येथे कौशल्य विद्यापीठ स्थापन करण्याचा अनुषंगाने पुणे येथील जगप्रसिद्ध सिम्बायोसिस कौशल्य आणि व्यवसायिक विद्यपीठचा मागील महिन्यात आपण दौरा केला होता. विद्यपीठाच्या प्रभारी कुलगुरू डॉ. स्वाती मुझुमदार यांच्याकडून सिम्बायोसिसमार्फत चालविल्या जात असलेल्या कौशल्य विकास विद्यापीठाची इत्यंभूत माहिती जाणून घेतली होती. या कौशल्य विद्यापीठात कोणते अभ्यासक्रम आहेत, त्यांच्या उपक्रमांची रूपरेषा काय याचे विस्तृत सादरीकरणही सिम्बायोसिसच्यावतीने त्यावेळी करण्यात आले होते. त्याचवेळेस तुळजाभवानी कौशल्य विद्यपीठाचा मास्टरप्लॅन तयार करण्याचे निश्चित करण्यात आले होते. त्यासाठी सिम्बॉयसिस विद्यापीठाने तांत्रिक सहकार्य करण्याचे उत्स्फूर्तपणे मान्य केले होते. त्यानुसार बुधवार १२ फेब्रुवारी रोजी सिम्बायोसिस कौशल्य विद्यापीठ आणि तुळजाभवानी अभियांत्रिकी महाविद्यालय यांच्यात सामंजस्य कराराची प्रक्रिया पूर्ण झाली आहे.

जावासारख्या कमी कालावधीच्या व लगेच नोकरी मिळेल, अशा कोर्सची आता लगेच सुरुवात केली जाईल. त्यानंतर सिम्बायोसिसचे अनुभवी आणि तज्ञांचे पथक धाराशिव जिल्ह्यातील एकूण भौगोलिक परिस्थिती, जिल्ह्यातील शेती आणि त्यावर आधारित शेतीपूरक उद्योग आदी बाबींची सखोल माहिती घेऊन कृषी-व्यवसाय, पर्यटन आणि अपारंपारिक ऊर्जासारखे डिप्लोमा/ प्रमाणपत्र अभ्यासक्रम तयार करण्यास मदत करणार आहेत. येणार्‍या दोन महिन्यांमध्ये तातडीने लागणार्‍या कुशल मनुष्यबळ उपलब्धतेसाठी अल्पकालीन अभ्यासक्रम सुरू करण्यात येणार आहेत, त्यासाठी विशेष तज्ञांचा समावेश असलेली समितीही गठीत करण्यात आली असल्याची माहिती आमदार राणाजगजितसिंह पाटील यांनी दिली आहे.

कौशल्य विद्यापीठामुळे मोठ्या प्रमाणात रोजगार संधी

कौशल्य विद्यापीठ हे उच्च दर्जाचे कौशल्यपूर्ण आणि रोजगारक्षम तरुण निर्माण करण्यासाठी, रोजगार निर्मितीला प्रोत्साहन देण्यासाठी आणि उच्च दर्जाचे कौशल्य शिक्षण, स्टार्टअप्स, इनक्युबेशन, रोजगारक्षमता, प्रशिक्षण, समुपदेशन, नोकरीवर आधारित प्रशिक्षण, याला प्रोत्साहन देण्यासाठी एक विशेष विद्यापीठ असणार आहे. त्यातून प्लेसमेंटही मोठ्या प्रमाणात होणार आहे. प्रशिक्षणानंतर, मूल्यांकन यंत्रणेमार्फत मूल्यांकन करून पात्र तरुणांना हक्काचा रोजगार मिळण्याच्या मोठ्या संधी उपलब्ध होणार असल्याचा विश्वासही आमदार राणाजगजितसिंह पाटील यांनी व्यक्त केला आहे.