सातारा: सातारा-लोणंद रस्त्यावर अंबवडे सं. वाघोली (ता. कोरेगाव) गावानजीक सोमवारी दोन ट्रकची समोरासमोर धडक होऊन झालेल्या भीषण अपघातात दोघे चालक ठार झाले. यातील एका ट्रकने अपघातानंतर पेट घेतल्याने त्याच्या चालकाचा ट्रकमध्ये अडकून मृत्यू झाला. याशिवाय अन्य दोघे यामध्ये जखमी झाले आहेत. अल्ताफ मन्सुरी, (वय-२०, रा. भगोरा, ता. जिरापूर, जि. राजगड, मध्यप्रदेश) आणि महेश दयानंद घुगे (वय ३७, हल्ली रा. गोकुळ शिरगाव, कोल्हापूर) असे मृत चालकांचे नाव आहे.
लोणंद बाजूकडून कडप्पा फरशी भरलेला ट्रक (क्रमांक आरजे १७ जीबी ६५६१) साताऱ्याच्या दिशेने चालला होता. तर आयशर (क्रमांक एमएचजी -७७७५ ) हा मालट्रक साताऱ्याहून लोणंदच्या दिशेने निघाला होता. आंबवडे चौक ते पिंपोडे खुर्द गावांच्या दरम्यान या ट्रकची समोरासमोर जोरदार धडक झाली. ही धडक इतकी भीषण होती की दोन्ही ट्रकच्या केबिनचा चक्काचूर झाला. त्यामध्ये कडप्पा भरलेल्या ट्रकचा चालक अल्ताफ मन्सुरी हा जखमी अवस्थेत अडकला होता. धडक इतकी भीषण होती की ट्रकच्या केबिनने पेट घेतला. त्या स्थितीत ट्रकचा जखमी झालेला क्लिनर मांगीलाल रामप्रसाद भोल याने जखमी चालकाला बाहेर काढण्याचा प्रयत्न केला. मात्र त्याला अपयश आहे.
हेही वाचा – अजित पवार आघाडीत असते, तर भविष्यात मुख्यमंत्री झाले असते; जयंत पाटलांची खोचक टीका
हेही वाचा – पलूसमध्ये महिलेला मारहाण करून लूटमार, महिला जखमी
मांगीलालच्या डोळ्यासमोर चालकाचा गाडीच्या आगीत जळून मृत्यू झाला. अन्य आयशर ट्रकच्याही केबिनचा पूर्ण चक्काचूर झाला. यामध्ये त्याचा चालक महेश दयानंद घुगे हा गंभीर जखमी झाला होता. त्याला वाठार स्टेशन पोलिसांनी तातडीने उपचारांसाठी शासकीय रुग्णालय सातारा येथे दाखल केले. मात्र उपचारादरम्यान त्याचाही मृत्यू झाला.
© The Indian Express (P) Ltd