अलिबाग: उद्योगमंत्री तथा रायगडचे पालकमंत्री उदय सामंत यांच्या स्पीड बोटीला मांडवा येथे अपघात झाला. चालकाचे बोटीवरील नियंत्रण सुटल्याने स्पीड बोट जेटीच्या खांबाना जाऊन धडकली. बोटीचा वेग कमी असल्याने मोठी दुर्घटना टळली.अलिबाग येथील जिल्हाधिकारी कार्यालयात बैठकीसाठी सामंत गेट वे ऑफ इंडियावरून मांडवा येथे स्पीड बोटीने निघाले होते. यावेळी छत्रपती संभाजीराजे त्यांच्या समवेत होते. मांडवा जेट्टीजवळ पोहोचल्यावर चालकाने जेटीवर लावण्यासाठी बोट वळवली. मात्र यावेळी चालकाचे बोटीवरील नियंत्रण सुटले आणि बोट जेटीच्या खालील खांबाना जाऊन धडकली.
यानंतर पालकमंत्री सामंत हे मांडवा येथे उतरून, रस्ते मार्गाने अलिबागकडे रवाना झाले. बोट जाऊन खांबाना आपटली तेव्हा लक्षात आले हे काही तरी भयंकर घडते आहे. सुदैवाने मोठी दुर्घटना झाली नाही. काही दिवसांपूर्वी याच मार्गावर प्रवास करताना, स्पीड बोट वाटेतच बंद पडली होती. यापुढे स्थानिक आमदारांना बरोबर घेऊनच स्पीड बोटीने प्रवास करणार आहे.-उदय सामंत, उद्योगमंत्री तथा पालकमंत्री रायगड</strong>
