Uddhav Thackeray Dasara Melava 2023 : खोकासुराचं दहन आपल्याला करायचंच आहे-उद्धव ठाकरे

५७ वर्षे झाली तरीही शिवसेनेची दसरा मेळाव्याची परंपरा आपण मोडली नाही. यापुढेही मोडणार नाही. ज्यांनी मोडता घालण्याचा प्रयत्न केला त्यांना मोडीत काढून आपण पुढे चाललो आहोत. आपला मेळावा झाल्यानंतर आपण खोकासुराचं दहन करणार आहोत. रामाने रावणाचा वध का केला? कारण मी ऐकलं आहे की रावणही शिवभक्त आहे. तरीही रामाला त्याला मारावं लागलं कारण रावण माजला होता. रावणाने सीतेला पळवलं होतं. त्याचप्रमाणे आपली शिवसेना पळवण्याचा प्रयत्न होतो आहे. एक खबरदारी त्यांनी घेतली आहे की त्यांनी आपला धनुष्यबाणही चोरला आहे. असं म्हणत उद्धव ठाकरेंनी एकनाथ शिंदे आणि चाळीस आमदारांवर टीका केली आहे. दसरा मेळाव्यात त्यांनी हे वक्तव्य केलं आहे.

मारुतीरायाने रावणाची सोन्याची लंका दहन केली होती. तशी या गद्दारांची खोक्यांची लंका आहे त्या पेटवणाऱ्या हजारो मशाली आपल्याकडे आहेत असंही उद्धव ठाकरेंनी म्हटलं आहे. हल्ली एक जाहिरात येते त्यात अक्षय कुमार, अजय देवगण आणि शाहरुख खान हे कमला पसंद वाले आहेत. तसं या गद्दारांना कमळा पसंत आहे. आमच्या नादाला आता त्यांनी लागू नये असाही टोला उद्धव ठाकरेंनी म्हटलं आहे.

"२०२४ च्या निवडणुकीत जनता शिंदेंना धडा शिकवणार आहे. ज्यांनी शिवसेनेच्या पाठीत खंजीर खुपसला त्यांना मातीत गाडल्याशिवाय आपण गप्प बसायचं नाही. उद्धव ठाकरेंचे विचार ऐकायला आपण आलो आहे. ते आपल्याला पुढच्या वर्षी होणाऱ्या निवडणुकीच्या दृष्टीने मार्गदर्शन करतील यात माझ्या मनात शंका नाही" असं भास्कर जाधव यांनी म्हटलं आहे.

महाराष्ट्रात रोज ७० मुली आणि महिला रोज बेपत्ता होत आहेत. हे लोक बेटी बचावची घोषणा करत आहेत. या सरकारला लाज उरलेली नाही. खासगीकरण केलं जातं आहे. आत्ताचं सरकार हे खोटी आश्वासनं देतं आहे. लोकांना आशेला लावतं आहे. मात्र हे सरकार खोटं आहे. यांनी दिलेली आश्वासनं खोटी आहेत असंही अंबादास दानवेंनी म्हटलं आहे.

दसरा मेळाव्यासाठी ठाकरे गटाचे कार्यकर्ते मुंबईकडे रवाना नवी मुंबईतून रवाना झाले आहेत. दसरा मेळाव्यासाठी ठाकरे गटातील हजारोंच्या संख्येने रवाना होण्यास दुपारी ३ नंतरच सुरुवात झाली. अनेक शिवसैनिक शिवतीर्थावर दसरा मेळाव्यासाठी ऐरोली स्टेशनरून ट्रेनने रवाना झाले. यावेळी निष्ठावंतांचा दसरा मेळावा असल्याचं कार्यकर्त्यांनी सांगितलं , तसेच मोठ्या प्रमाणावर घोषणाबाजी देखील करण्यात आली.

संपूर्ण शिवाजी पार्क मैदान हे भरणार आणि सेना भवनापर्यंत आजच्या दसरा मेळाव्याची गर्दी असेल असा विश्वास शिवतीर्थावर जमलेल्या शिवसैनिकांनी व्यक्त केला आहे. आज उद्धव ठाकरेंचे विचार ऐकायला आम्ही आलो आहोत असं तिथे जमलेल्या शिवसैनिकांनी म्हटलं आहे.

छत्रपती संभाजी राजे यांचा जन्म जिथे झाला त्या भूमीतून आम्ही आलो आहोत. आज आम्ही खऱ्या शिवसेनेचे म्हणजेच शिवसेना पक्षप्रमुख उद्धव ठाकरेंचे विचार ऐकण्यासाठी आम्ही आलो आहोत. या ठिकाणी ७० ते ८० हजार लोक आले आहेत. शिंदे गटाचा आजचा दसरा मेळावा हा शेवटचा दसरा मेळावा आहे. कारण सगळा खर्च शासकीय आहे. शिंदे गटाच्या मेळाव्याला पैसे देऊन लोक आणले जात आहेत असं दादा जिंजुरकर या शिवसैनिकाने म्हटलं आहे.