राज्यातील सत्तासंघर्षांवर सर्वोच्च न्यायालयात सुरू असलेल्या सुनावणीचा आज तिसरा दिवस आहे. अवघ्या राज्याचे लक्ष या सुनावणीकडे लागले आहे. दोन्ही बाजूंच्या वकिलांकडून जोरदार युक्तिवाद सुरू आहे. दरम्यान, राजकीय वर्तुळातूनही विविध प्रतिक्रिया समोर येत आहेत. या पार्श्वभूमीवर विधानपरिषद विरोधी पक्षनेते अंबादास दानवे यांनीही प्रतिक्रिया दिली आहे.
“निकालाची दिशा तर न्यायाच्या दिशेने असेल, कारण ज्या पद्धतीने शिवसेना पक्षाशी ४० लोकांनी गद्दारी केलेली आहे. गद्दारांना धडा तर न्यायालय शिकवेल, ही खात्री आहे. कायद्याच्या चौकटीत जर बघितलं, तरी पक्षांतर बंदी कायदा असेल, निश्चित या ४० लोकांनी मोठी चूक केली आहे याची शिक्षा त्यांना भोगावी लागेल.” असं अंबादास दानवे एबीपी माझाशी बोलताना म्हणाले आहेत.
याशिवाय, “पक्षाच्या ज्या बैठकांना ही सगळी गद्दार मंडळी उपस्थित होती. या सर्वांनी पक्षनेतृत्वाला बाजूला करून, वेगळ्या पद्धतीने राज्यपालांकडे दावे केले आहेत. हे पक्षश्रेष्ठीला धरून नव्हतेच आणि नाहीत, म्हणून या सगळ्या गोष्टीच्या आधारावर निश्चितपणे येणाऱ्या काळात न्याय होईल.” असंही दानवेंनी यावेळी सांगितलं.
याचबरोबर “उद्धव ठाकरे हे काय खुर्चीला चिकटून बसणारं नेतृत्व नाही. खुर्चीसाठी काम करणारं नेतृत्व नाही, खुर्ची त्यांच्यासाठी आलेली होती. म्हणून त्यांनी जो जो त्यावेळेस त्यांच्या बुद्धीला स्मरून, आंतरिक आत्म्याने जो आवाज दिला त्यानुसार प्रतिक्रिया दिलेली आहे. कायदा जे करेल ते करेल.” असंही अंबादास दानवे यांनी यावेळी बोलून दाखवलं.
