ठाकरे गटाचे प्रमुख उद्धव ठाकरे यांनी एकनाथ शिंदे गटावर जोरदार टीका केली आहे. आपल्यातील काही लोक गळ्यात पट्टा बांधून तिकडे गेले आहेत, अशा शब्दांत उद्धव ठाकरेंनी शिंदे गटाचा समाचार घेतला. तसेच पक्षफुटीवर भाष्य करताना ठाकरे म्हणाले, आम्ही अर्ध्या रात्री लपून-छपून तुमच्यासारख्या बैठका घेतल्या नाहीत. आम्ही दिवसाढवळ्या काँग्रेसबरोबर गेलो होतो. ठाण्यात हिंदी भाषक कार्यकर्त्यांच्या मेळाव्यात ते बोलत होते.
यावेळी उद्धव ठाकरे म्हणाले, “तुम्ही म्हणता मी काँग्रेसबरोबर गेलो होतो. होय, मी काँग्रेसबरोबर गेलो होतो पण खुलेआम (दिवसाढवळ्या) गेलो होतो. मी तुमच्यासारखं अर्ध्या रात्री लपून-छपून बैठका नव्हत्या घेतल्या. पण मी भाजपाला एक प्रश्न विचारू इच्छितो की, आम्हाला काँग्रेसबरोबर जाण्यास मजबूर कुणी केलं? भाजपाबरोबर आम्ही २५ वर्षे होतो. ही जगातील एकमेव युती असेल, जी इतकी वर्षे हिंदुत्वासाठी मजबूतीने एकत्र राहिली. ही युती सगळ्यात आधी कुणी तोडली असेल तर ती भाजपानेच तोडली.”
हेही वाचा- “…तर हा देश नालायक लोकांच्या हातात जाईल”, उद्धव ठाकरेंचा नरेंद्र मोदींवर हल्लाबोल
“आता आपल्यातील काही लोक गळ्यात पट्टा बांधून तिकडे गेले आहेत. तसा पट्टा माझ्या गळ्यात बांधणारा अजून कुणी पैदा (जन्मला) झाला नाही आणि तो होणारही नाही. कारण माझ्या नसांमध्ये बाळासाहेब ठाकरेंचं रक्त वाहत आहे. मी कधीही लाचार किंवा गुलाम बनणार नाही. मी तुमच्यासारख्या माझ्या हिंदू लोकांसमोर नक्की झुकेल. पण मी हुकूमशाहीपुढे कधीही झुकणार नाही. मी हुकूमशाही कधीही मान्य करणार नाही,” असंही उद्धव ठाकरे म्हणाले.
