आगामी २०२४ च्या लोकसभा निवडणुकीचे वारे देशभर वाहू लागले आहेत. विरोधी पक्षांच्या ‘इंडिया’ आघाडीसह सत्ताधारी भाजपाच्या ‘एनडीए’ने मोर्चेबांधणी सुरू केली आहे. महाराष्ट्रातही विधानसभेसह लोकसभेच्या निवडणुकीसाठी सर्वच पक्षांकडून जोरदार तयारी केली जात आहे. पण महाविकास आघाडी आणि महायुतीत जागावाटपाबद्दल अद्याप स्पष्टता आली नाही. येत्या काही दिवसांत अनेक बाबी स्पष्ट होतील.
दुसरीकडे, वंचित बहुजन आघाडीने अलीकडेच ठाकरे गटाशी युती केली आहे. पण ठाकरे गट महाविकास आघाडीचा घटक पक्ष असला तरी वंचित बहुजन आघाडी महाविकास आघाडीचा भाग नाही. त्यामुळे महाविकास आघाडीतून ठाकरे गटाला किती जागा मिळणार आणि त्यातून वंचित बहुजन आघाडीला किती मिळणार? याबाबत संभ्रम निर्माण झाला आहे. अशी एकंदरीत स्थिती असताना वंचित बहुजन आघाडीचे अध्यक्ष प्रकाश आंबेडकर यांनी मोठी घोषणा केली आहे. २०२४ च्या लोकसभा निवडणुकीत सर्वच ४८ जागांवर निवडणूक लढणार असल्याची घोषणा प्रकाश आंबेडकर यांनी केली आहे.
“आगामी २०२४ च्या निवडणुकीत आम्ही लोकसभेच्या सर्व ४८ जागा लढवू. आमच्या पक्षाने लोकसभा निवडणुकीची तयारी सुरू केली आहे. मी अकोला लोकसभा मतदारसंघातून निवडणूक लढवणार आहे,” अशी घोषणा वंचित बहुजन आघाडीचे (VBA) अध्यक्ष प्रकाश आंबेडकर यांनी केली.
