Vijay Wadettiwar On Tekchand Sawarkar : विधानसभेची निवडणूक तोंडावर आल्यामुळे राज्यात घडामोडींना वेग आला आहे. निवडणुकीच्या अनुषंगाने सर्वच राजकीय पक्षांनी जोरदार तयारी सुरु केली आहे. सध्या अनेक नेत्यांचे सभा, मेळावे आणि बैठका सुरु आहेत. अशातच ‘मुखमंत्री लाडकी बहीण योजना’ महायुती सरकारने आणली. सध्या या ‘मुखमंत्री लाडकी बहीण योजने’ची मोठी चर्चा सुरु आहे. या योजनेच्या माध्यमातून लाभार्थी महिलांना दर महिन्याला १५०० रुपये देण्यास सुरुवात करण्यात आली आहे. मात्र, असे असतानाच काही दिवसांपूर्वी आमदार रवी राणा आणि शिंदे गटाचे नेते महेश शिंदे यांनी मुखमंत्री लाडकी बहीण योजनेबाबत केलेल्या वक्तव्याने वाद निर्माण झाला होता.

यानंतर आता भारतीय जनता पक्षाचे आमदार टेकचंद सावरकर यांचा लाडकी बहीण योजनेबाबतचा एक व्हिडीओ काँग्रेसचे नेते आणि विरोधी पक्षनेते विजय वडेट्टीवार यांनी एक्स या मायक्रोब्लॉगिंग प्लॅटफॉर्मवर पोस्ट केला आहे. तसेच पोस्टमध्ये विजय वडेट्टीवार यांनी महायुतीवर हल्लाबोल केला आहे. “महायुतीची भानगड समोर आली, मतांचा दुष्काळ संपवण्यासाठी लाडकी बहीण योजनेचा जुगाड केला आहे”, असं म्हणत विजय वडेट्टीवार यांनी भाजपाचे आमदार टेकचंद सावरकर यांचा एक व्हिडीओ शेअर केला आहे. त्या व्हिडीओमध्ये भाजपा आमदार लाडकी बहीण कमळाला मत देईल, म्हणून हा जुगाड केला असं म्हणत आहेत.

हेही वाचा : Prakash Ambedkar : “अक्षय शिंदेला पोलीस कशाच्या शोधासाठी घेऊन जात होते?”, प्रकाश आंबेडकरांचा सवाल

विजय वडेट्टीवार यांचं ट्वीट काय?

“अखेर महायुतीची भानगड पुढे आली! महायुतीला मतांचा दुष्काळ आहे, म्हणून लाडकी बहीण योजना मतांसाठी केलेला जुगाड आहे. भाजपाच्या या आमदाराने मान्य केलं की महायुतीतील सर्व नेते खोटं बोलतात. लाडकी बहीण योजना माता भगिनींना लाभ देण्यासाठी नव्हे तर मत पेटीतून लाभ घेण्यासाठी आहे”, असा हल्लाबोल विधानसभेचे विरोधी पक्षनेते विजय वडेट्टीवार यांनी एक्स या मायक्रोब्लॉगिंग प्लॅटफॉर्मवर केलेल्या पोस्टमधून केला आहे. तसेच याच पोस्टमध्ये विजय वडेट्टीवार यांनी भारतीय जनता पक्षाचे कामठी मौदा विधानसभा मतदारसंघाचे आमदार टेकचंद सावरकर यांच्या भाषणाचा एक व्हिडीओ पोस्ट केला आहे. त्यामध्ये टेकचंद सावरकर हे लाडकी बहीण योजनेवर बोलत आहेत.

व्हिडीओमध्ये भाजपा आमदार काय म्हणाले?

“आम्ही एवढी मोठी भानगड कशासाठी केली, तुम्ही इमानदारीने सांगा. ज्या दिवशी तुमच्या घरापुढे मतदानाची पेटी येईल. त्यावेळी या माझ्या लाडक्या बहिणी कमळाला मत देतील, यासाठी आम्ही हे जुगाड केलंय. हे सर्वजण खोटं बोलले असतील. मात्र, मी खरं बोलतो. माझं बोलणं खरं आहे की नाही? नाहीतर बोलायचं एक आणि करायचं एक, मी काय रामदेव बाबांचा कार्यकर्ता आहे का?”,असं भाजपाचे आमदार टेकचंद सावरकर हे व्हिडीओमध्ये म्हणत आहेत.