लोकसत्ता वार्ताहर पंढरपूर : राज्यातील धनगर समाजाला घटनेनुसार एसटी आरक्षण असून त्याची तत्काळ अंमलबजावणी करा. या पूर्वी सत्तेमधील असलेले आणि नसलेल्या राजकर्त्यांनी आरक्षण देतो म्हणाले पण दिले नाही. त्यामुळे आरक्षणप्रश्नी सरकारने तातडीने निर्णय घ्यावा अन्यथा येणाऱ्या विधानसभेला सत्तेच्या खुर्चीवरून पाय उतार करणार असा निर्वाणीचा इशारा धनगर समाजाने दिला आहे. येथे पाच जणांनी बेमुदत उपोषणाला सुरुवात केली आहे. दरम्यान या वेळी मनोज जरांगे यांच्यावर टीका करण्यात आली. जरांगे हे जातीजातीत भांडण लावण्याचे काम करीत असून त्यांच्या सर्व बैठका रात्रीच्या अंधारात का होतात, असा प्रश्न उपस्थित करण्यात आला. धनगर समाजाला एसटीमधून आरक्षण मिळावे या मागणीसाठी समस्त समाजाच्या वतीने येथील टिळक स्मारक मैदानात सोमवारपासून बेमुदत उपोषणाला सुरुवात केली आहे. मागील ७० वर्षा पासून धनगर समाज सनदशीर मार्गाने आरक्षण अंमलबजावणीची मागणी करत आहे. परंतु प्रत्येक सरकारने आश्वासनापलीकडे काही दिले नाही. म्हणून धनगर जमातीमध्ये असंतोष पसरलेला आहे. विद्यमान राज्य सरकारने आता तरी तत्काळ आरक्षण अंमलबजावणीचा अध्यादेश काढावा अन्यथा त्यांना सत्तेतून खाली खेचू, असा इशारा पांडुरंग मरगळ यांनी दिला आहे. तर आरक्षण प्रश्नावर वारंवार चालढकल होत असून या प्रश्नावर तातडीने तोडगा न काढल्यास सोलापूर जिल्ह्यात येणाऱ्या मुख्यमंत्री, उपमुख्यमंत्री यांना काळे झेंडे दाखविणार असल्याचे उपोषणकर्ते माउली हळणवर यांनी इशारा दिला. आणखी वाचा-पुणे-हुबळी वंदेभारत एक्स्प्रेसला मंजुरी धनगर समाजाच्या पाच जणांनी प्रातिनिधी स्वरूपात उपोषण सुरू केले आहे. यामध्ये जालन्याचे दीपक बोराडे, पुणे येथील योगेश धरम, सातारा येथील गणेश केसकर, पंढरपूरचे माउली हळणवर आणि विजय तमनर राहुरी यांचा समावेश आहे. या उपोषण आंदोलनात मुंबई, पुणे, नागपूर, धुळे, छत्रपती संभाजीनगर, सांगली, सातारा, अकोला, अहिल्यानगरसह राज्यातील सर्व जिल्ह्यांतून धनगर बांधव उपस्थित होते. दरम्यान, धनगर समाजाचे नेते नवनाथ वाघमोडे यांनी यावेळी मराठा आरक्षणाचे आंदोलनकर्ते मनोज जरांगे पाटील यांच्यावर टीका केली. जरांगे पाटील हे जातीजातीत भांडण लावण्याचे काम करीत असून त्यांच्या सर्व बैठका रात्रीच्या अंधारात का होतात, असा प्रश्न त्यांनी उपस्थित केला. धनगर आरक्षणाला जरांगे पाटील यांच्या पाठिंब्याची गरज नसून आम्ही यासाठी सक्षम आहोत, अशी टीका वाघमोडे यांनी केली.
