IndiGo Airlines Flight : इंडिगो एअरलाईन्सच्या एका विमानात एक धक्कादायक घटना घडल्याची माहिती समोर आली आहे. इंडिगोच्या एका फ्लाईटमध्ये एका प्रवासी महिलेचा बसल्या जागी मृत्यू झाल्याची घटना समोर आली आहे. ही घटना घडल्यानंतर या विमानाचे छत्रपती संभाजीनगरमध्ये इमर्जन्सी लँडींग करण्यात आलं आहे. यानंतर या महिलेला मृत घोषित करण्यात आलं. दरम्यान, या घटनेमुळे प्रवाशांमध्ये एकच खळबळ उडाली आहे.
मुंबई ते वाराणसी जाणाऱ्या इंडिगोच्या एका विमानात एक ८९ वर्षीय महिला प्रवास करत होती. मात्र, विमान हवेत असतानाच महिलेची तब्येत बिघडली. यानंतर काही वेळाने या महिलेचा विमानात मृत्यू झाला. यानंतर छत्रपती संभाजीनगर विमानतळावर विमानाचे इमर्जन्सी लँडींग करण्यात आलं आणि त्यानंतर त्या महिलेला मृत घोषित करण्यात आलं. या संदर्भातील वृत्त इंडिया टुडेनी दिलं आहे.
दरम्यान, ही महिला उत्तर प्रदेशातील मिर्झापूर येथील रहिवासी असून सुशीला देवी असं त्यांचं नाव असल्याची माहिती सांगितली जाते. सुशीला देवी या मुंबईहून जेव्हा विमानात बसल्या त्यानंतर काही वेळातच त्यांना अस्वस्थ वाटू लागलं होतं. या घटनेबाबतची माहिती देताना एका अधिकाऱ्याने सांगितलं की, रात्री १० वाजण्याच्या सुमारास वैद्यकीय आपत्कालीन परिस्थितीमुळे इंडिगोचं एक विमान छत्रपती संभाजीनगरमध्ये उतरवण्यात आलं. त्यानंतर वैद्यकीय पथकाने संबंधित महिलेची तपासणी केली. मात्र, त्याआधीच त्यांचा मृत्यू झाला होता.
यानंतर छत्रपती संभाजीनगरमधील एमआयडीसी सिडको पोलीस स्टेशनने आवश्यक औपचारिकता पूर्ण केल्यानंतर हे विमान वाराणसीच्या पुढील प्रवासासाठी रवाना करण्यात आलं असल्याची माहिती एका अधिकाऱ्याने सांगितली आहे. एअरलाइन्सच्या म्हणण्यांनुसार, यानंतर त्या महिलेचा मृतदेह छत्रपती संभाजीनगर येथील सरकारी वैद्यकीय रुग्णालयात पाठवण्यात आला.
या आधीही घडली होती अशीच घटना
एअर इंडियाच्या विमानात काही दिवसांपूर्वी एक अशाच प्रकारची घटना घडली होती. दिल्लीवरून लखनौ विमानतळावर पोहोचलेल्या एअर इंडियाच्या एका विमानात एक प्रवासी मृतावस्थेत आढळून आला होता. या घनेमुळे मोठी खळबळ उडाली होती. एअर इंडियाचे क्रमांक एआय २८४५ हे विमान नवी दिल्लीहून लखनौत दाखल झाले होते. विमान प्रवासादरम्यान या प्रवाशाला झोप लागली होती. मात्र, विमान नवी दिल्लीहून लखनौच्या चौधरी चरण सिंह आंतरराष्ट्रीय विमानतळावर लँडिंग झाल्यानंतरही तो प्रवाशी उतरलाच नाही.
विमानाचं लँडिंग झालं पण तरीही प्रवाशी न उतरल्यामुळे क्रू मेंबर्सना संशय आला. त्यानंतर क्रू मेंबर्सनी प्रवाशाशी संवाद साधण्याचा प्रयत्न केला. परंतु त्यांना कोणताही प्रतिसाद मिळाला नाही. विमानातील क्रू मेंबर्सनी त्या प्रवाशाचा सीट बेल्ट काढल्यानंतर तो प्रवाशी मृत झाला असल्याचं आढळून आलं. हे पाहून एकच गोंधळ उडाला होता.
