बॉलिवूड अभिनेत्री तापसी पन्नू हिने भारतीय अंतराळ संशोधन संस्थेवर (इस्रो) केलेल्या अभिनंदनाच्या टि्वटमुळे तीला लोकांच्या थट्टेला सामोरे जावे लागले आहे. तापसी ही 'बॉलिवूडची नवी आलिया भट' असल्याचेही लोकांनी तिची थट्टा करताना म्हटले आहे. इस्रोने 'आईआरएनएसएस-वनएच' या दिशादर्शक उपग्रहाचे आंध्रप्रदेशातील श्रीहरिकोटा येथून गुरुवारी प्रक्षेपण केले. मात्र, हा त्यांचा प्रयत्न अपयशी ठरला. या कार्यक्रमाच्या अपयशाबाबत इस्रोचे अध्यक्ष ए. एस. किरणकुमार यांनी पत्रकार परिषदेत माहितीही दिली. त्यांनी सांगितले की, प्रक्षेपणानंतर चौथ्या टप्प्यात हिट शील्ड उपग्रहापासून वेगळे झाले नाही. त्यामुळे हे प्रक्षेपण अखेरच्या टप्प्यात अयशस्वी ठरले होते. सुरूवातीला अनेक प्रसार माध्यमांनीही इस्रोने उपग्रहाचे प्रक्षेपण केल्याच्या बातम्या दिल्या होत्या. मात्र, त्यानंतर काही वेळातच इस्रोने हे प्रक्षेपण अयशस्वी ठरल्याचे स्पष्ट केले होते. मात्र, तापसी पन्नू हिने दुसऱ्या दिवशी एका संकेतस्थळावरील बातमीचा दाखला देत ट्विटरवरून इस्रोचे अभिनंदन केले. साहजिकच त्यानंतर नेटकऱ्यांनी तिची चांगलीच थट्टा उडवली. इस्रोने गुरुवारी संध्याकाळी ७ वाजता भारतीय नौवहन उपग्रह प्रणाली (एनएवीआईसी) अंतर्गत १४२५ किलोच्या या उपग्रहाचे पीएसएलव्ही श्रेणीतील एक्सएल प्रणालीतील रॉकेटद्वारे प्रक्षेपण केले होते. भारतीय उपग्रह प्रणालीतील 'एनएवीआईसी'ला सर्वसाधारण शब्दांत भारताची जीपीएस प्रणाली असे संबोधले जाते.