सीआयडी मालिकेला पसंत करणाऱ्या प्रेक्षकांसाठी एक वाईट बातमी आहे. एसीपी प्रद्युम्न यांचे हृदयविकाराच्या झटक्याने निधन होणार असल्याचे मालिकेत दाखविण्यात येणार आहे. साधारणपणे, दोन दशकांपेक्षा अधिक काळ चालणाऱ्या या मालिकेचा प्रेक्षकवर्ग उत्तरोत्तर वाढतच राहीला. पण, आता सीआयडीमध्ये एसीपी प्रद्युम्न या व्यक्तिरेखेचा मृत्यू होणार आहे. मालिकेत त्यांच्या मृत्यूचे कारण हृदयविकाराच्या झटक्याने त्यांचा मृत्यू होईल असे दाखविण्यात येणार आहे. असे म्हटले जाते की, एसीपी प्रद्युम्न यांचा हा भाग येत्या २६ डिसेंबरला प्रक्षेपित करण्यात येणार आहे. प्रदेश १८ या संकेतस्थळाने प्रसिद्ध केलेल्या वृत्तानुसार, एसीपी प्रद्युम्न ही व्यक्तिरेखा साकारणारे अभिनेते शिवाजी साटम आणि अन्य कलाकारांना मानधनात वाढ हवी होती. पण, वाहिनी आणि मालिकेच्या प्रॉडक्शन टीमला त्यांची मानधन वाढीची मागणी मान्य न केल्याचे कळते. यामुळेच या कार्यक्रमातून आता एसीपी प्रद्युम्न यांची व्यक्तिरेखा दिसणार नाही. मालिकाही होणार बंद एसीपी प्रद्युम्न यांच्या मृत्युसोबतच सीआयडी ही मालिकाही बंद होणार असे म्हटले जात आहे. पण याबाबतीत प्रॉडक्शन हाऊसकडून कोणतीही अधिकृत घोषणा झालेली नाही. इतकी वर्षे एकच टीम कुठल्याही वादविवादात न पडता काटेकोरपणे काम करत असेल तर त्यांच्यात नक्कीच काही वेगळं रसायन असणार. शिवाजी साटम म्हणजे ‘सीआयडी’चे हुकमी शिलेदार. मालिका सुरू केली तेव्हा पुढची किमान दोन ते तीन वर्षे या मालिकेला कोणीच धक्का लावू शकणार नाही, याची आपल्याला खात्री होती. पण, कधी या तीन वर्षांचे गुणिले सहा झाले हे मात्र अजूनही आपल्याला कळलेलं नाही. असं ते काही महिन्यांपूर्वी दिलेल्या एका मुलाखतीत म्हणाले होते.