जुन्या चुका, कटू आठवणी, वाईट अनुभव या सर्व गोष्टी बाजूला सारून 'कॉमेडी किंग' कपिल शर्माने नवा शो सुरू केला आहे. पुन्हा एकदा प्रेक्षकांना खळखळून हसवण्यासाठी तो सज्ज झाला आहे. मात्र त्याच्या 'फॅमिली टाइम विथ कपिल शर्मा' या शोच्या शूटिंगलाही ग्रहण लागलंय असं म्हणावं लागेल. कारण नवाकोरा शो सुरू होऊन आठवडाही पूर्ण झाला नाही तोच एका सेलिब्रिटीसोबत शूटिंग रद्द केल्याची माहिती समोर येत आहे. अभिनेत्री राणी मुखर्जी तिच्या आगामी 'हिचकी' या चित्रपटाच्या प्रमोशननिमित्त कपिलच्या शोमध्ये हजेरी लावणार होती. बुधवारी याचं शूटिंग होणार होतं. मात्र ऐनवेळी कपिलने हे शूटिंग रद्द केल्याची सूत्रांची माहिती आहे. त्याने हे शूटिंग रद्द का केले याची माहिती अद्याप स्पष्ट झाली नाही. करिअरची विस्कटलेली घडी पुन्हा नीट बसवण्याची संधी कपिलसमोर या नव्या शोच्या माध्यमातून आली. मात्र शूटिंग रद्दच्या घटना समोर आल्याने त्याच्यावर पुन्हा एकदा टीका होऊ लागली आहे. वाचा : कॉमेडियन सिद्धार्थ सागर गेल्या चार महिन्यांपासून बेपत्ता? सहकलाकार सुनील ग्रोवरशी वाद झाल्यानंतर कपिलच्या जुन्या शोवर बराच परिणाम दिसून आला होता. शाहरुख खान, अजय देवगण यांसारख्या सेलिब्रिटींचे शूटिंग त्याने ऐनवेळी रद्द केले होते. इतकंच नव्हे तर तो व्यसनाधीनही झाला होता. या सर्व कारणांमुळे सोनी वाहिनीकडून कपिलला काही काळ ब्रेक देण्यात आला. ब्रेकनंतर कपिल पुन्हा नव्या जोमाने कामाला लागला. प्रेक्षकांकडूनही कपिलच्या नव्या शोकडून बऱ्याच अपेक्षा होत्या. आता कपिल या चुका टाळत पुन्हा एकदा प्रेक्षकांची मनं जिंकण्यात यशस्वी ठरणार का, हे पाहणं महत्त्वाचं ठरणार आहे.