गेल्या काही दिवसांपासून बॉलिवूडमध्ये शिबानी- फरहान यांच्या नात्याची जोरदार चर्चा आहे. २०१६ मध्ये पत्नी अधुनाशी घटस्फोट घेतल्यानंतर फरहानचं नाव अभिनेत्री श्रद्धा कपूरशी जोडलं गेलं. त्यांच्या नात्याच्या चर्चा क्षमत नाही तोच फरहान आणि शिबानीच्या नात्याच्या चर्चांनाही सुरूवात झाली. काही दिवसांपूर्वीच शिबानीनं, फरहान आणि मी चांगले मित्र असल्याचं सांगत या चर्चा फेटाळून लावल्या होत्या. पण फरहाननं नुकत्याच इन्स्टाग्रामवर शेअर केलेल्या पोस्टमुळे त्यांचं नातं पुन्हा एकदा चर्चेत आलं आहे. शिबानीच्या वाढदिवशी फरहाननं तिचा फोटो इन्स्टाग्रामवर पोस्ट करत तिला वाढदिवसाच्या भरभरून शुभेच्छा दिल्या आहेत. फरहाननं शिबानीचा फोटो पोस्ट केल्यानं आता सगळ्यांच्या भुवया आश्चर्यानं उंचावल्या. २०१५ पासून फरहान आणि शिबानी एकमेकांना ओळखतात. एका शोदरम्यान या दोघांमध्ये मैत्री झाली. फरहान जो शो होस्ट करत होता त्या शोचा शिबानी भाग होती़. काही दिवसांपूर्वीच लंडनमध्ये फरहान आणि शिबानीला एकत्र पाहिलं गेलं. याआधीही बऱ्याचदा दोघांना एकत्र पाहिलं गेलं. मात्र फरहानसोबतच्या रिलेशनशिपच्या चर्चा निव्वळ अफवा असल्याचं सांगत शिबानीनं डेटिंगचं वृत्त फेटाळून लावलं होतं. मात्र आता शिबानीचा फोटो शेअर करत फरहाननं तिला शुभेच्छा दिल्यानं पुन्हा एकदा त्यांच्या नात्याची चर्चा सुरू झाली आहे.
