तुम्हाला २००८ मध्ये 'जय श्री कृष्ण' या मालिकेत काम करणारा तो छोटा कृष्ण आठवतोय का? या बाळकृष्णाने तेव्हा साऱ्यांनाच वेड लावले होते. बाळकृष्ण कुठेही गेला तरी त्याच्या मागे त्याचे चाहते गराडा घालायचेच. पण आता हे बाळ मोठं झालं आहे. 'जय श्री कृष्ण' मालिका बघताना अनेकांना तो मुलगाच आहे असे वाटत होते पण मुळात तो मुलगा नसून एक मुलगी होती. धृती भाटिया असे या बालकलाकाराचे नाव धृती आता ११ वर्षांची झालीये. जेव्हा तिने श्रीकृष्णाची भूमिका साकारली तेव्हा ती फक्त अडीज वर्षांची होती. ती कुठेही बाहेर गेले की लोकांना श्रीकृष्ण आला असेच वाटायचे. हे आम्ही नाही तर खुद्द धृतीने एका मुलाखतीत सांगितले आहे. धृति म्हणते की, त्या मालिकेवेळी मी फार लहान होते. पण मालिका करताना लोकं मला भेटण्यासाठी अगदी भक्ती भावाने यायचे. एवढंच नाही तर ते मला श्रीकृष्णच मानायचे आणि तसे वागवायचे. या मालिकेमुळे मला फक्त प्रसिद्धीची मिळाली असे नाही तर ही मालिका मला सकारात्मकताही देऊन गेली. ही मालिका संपून आता ८ वर्षे लोटली पण त्या मालिकेची क्रेझ प्रेक्षकांमध्ये कमी झालेली नाही. मी आजही इस्कॉन मंदिरात जाते. आठवड्यातून एकदा तरी मी भगवान कृष्णाच्या मंदिरात जाऊन आशिर्वाद घेते, असं सांगायला धृती विसरली नाही. भविष्यात करिअरमध्ये काय करायचं आहे असा प्रश्न जेव्हा धृतीला विचारण्यात आला तेव्हा थोडाही वेळ न दडवता तिने तिला नृत्य दिग्दर्शक व्हायचे आहे असे सांगितले. धृतीची आई स्वतः नृत्यदिग्दर्शिका असल्यामुळे तिलाही आपल्या आईच्या पावलांवर पाऊल ठेवायचंय. सध्या सहावीत शिकणाऱ्या धृतीला नृत्याव्यतिरिक्त फोटोग्राफी आणि पेन्टिंगचीदेखील आवड आहे. सध्या ती शास्त्रीय नृत्य शिकतेय. धृतीचे वडील गगन भाटिया हे उद्योगपती असून आई पूनम कोरियोग्राफर आहे.