बॉलिवूड अभिनेत्री कंगना रणौत आपल्या वादग्रस्त वक्तव्यांमुळे नेहमीच चर्चेत असते. सोशल मीडियाच्या माध्यमातून कंगनाने आपलं मत व्यक्त करत असते. सोशल मीडियावरील पोस्टमुळे अनेकदा ती वादातही अडकली आहे. दरम्यान कंगनाने आता एक नवं वक्तव्य केलं असून संपूर्ण जगात आपल्यासारखी प्रतिभावान अभिनेत्री कोणीच नाही असं म्हटलं आहे.

कंगना ट्विट करत म्हणाली आहे की, “या संपूर्ण जगात माझ्यासारखी वेगवेगळी भूमिका साकारण्याची प्रतिभा कोणामध्ये असेल तर मी माझा अहंकार सोडून देईन. तोपर्यंत मी नक्कीच अहंकारात राहू शकते.” याआधी एक ट्विट करत कंगनाने आपली तुलना हॉलिवूड अभिनेत्री गॅल गॅडोटशी केली होती. त्या ट्विटवरून कंगना प्रचंड ट्रोल झाली होती.

कंगना लवकरच ‘थलाइवी’ या चित्रपटात दिसणार आहे. या चित्रपटात ती तामिळनाडूच्या दिवंगत माजी मुख्यमंत्री जयललिता यांची भूमिका साकारत आहे. याशिवाय तिचा ‘तेजस’ हा चित्रपटही प्रेक्षकांच्या भेटीला येत आहे.