सोशल मीडियाच्या माध्यम बरेच सेलिब्रिटी त्यांच्या आगामी चित्रपटांचे अपडेट्स चाहत्यांपर्यंत पोहोचवत असतात. मात्र पोस्ट टाकताना केलेली एखादी सामान्य चूकसुद्धा त्यांच्यासाठी महागात पडू शकते. असाच काहीसा अनुभव निर्माता- दिग्दर्शक करण जोहरलासुद्धा आला आहे. करणच्या आगामी 'केसरी' चित्रपटात अक्षय कुमारच्या पत्नीची भूमिका परिणीती चोप्रा साकारणार आहे. हीच घोषणा त्याने ट्विटरवर केली. पण ट्विट करताना त्याच्याकडून एक मोठी चूक झाली आणि त्यामुळे ट्विटरकरांनी त्याला ट्रोल केले. 'केसरी'मध्ये अक्षय कुमारच्या पत्नीची भूमिका परिणीती साकारणार असल्याचे ट्विट करणने केले. पण परिणीतीच्या जागी त्याने अक्षयचाच 'केसरी'मधील लूक असलेला फोटो पोस्ट केला. त्यामुळे अक्षयचा फोटो आणि नाव परिणीतीचं असल्याने नेटकऱ्यांनी ट्रोल करण्यास सुरुवात केली. काहींनी तर हास्यास्पद मीम्ससुद्धा त्या ट्विटच्या कमेंटमध्ये पोस्ट केले. वाचा : आलियाचा स्टाईल मंत्रा आता पुणेकरांसाठी या ट्रोलमुळे अखेर करणला माफी मागावी लागली. पुन्हा नव्याने ट्विट करत करणने त्याची चूक सुधारली. 'चित्रपटाच्या नायिकेच्या घोषणेसह केसरीचा पोस्टरही दाखवायचा होता. पण, आता परिणीती या चित्रपटात मुख्य भूमिकेत असेल याची घोषणा पुन्हा करतो,' असे म्हणत करणने परिणीतीचा फोटो पोस्ट केला.