चित्रपटांतील ठराविक भूमिका प्रेक्षकांच्या कायम लक्षात राहतात. मग ती बालकलाकाराची का असेना. असाच एक बालकलाकार बॉलिवूडमध्ये चांगलाच प्रसिद्ध झाला. सत्तर ते ऐशीच्या दशकात या कलाकाराने अनेक बालभूमिका साकारल्या होत्या. म्हणूनच अलंकार जोशी असं नाव असलेला हा पुढे 'मास्टर अलंकार' म्हणूनच ओळखला जाऊ लागला. 'शोले', 'सीता और गीता', 'ड्रीमगर्ल' यांसारख्या गाजलेल्या आणि जवळपासून १०० हून अधिक हिंदी चित्रपटांनी त्याने वैविध्यपूर्ण भूमिका साकारल्या. 'दिवार' या चित्रपटात त्याने अमिताभ बच्चन यांच्या बालपणीची भूमिका बजावली होती. बालकलाकार म्हणून प्रसिद्धीस आलेला हा मुलगा मोठेपणी मात्र इंडस्ट्रीतून गायब झाला. अलंकार जोशी हा मराठमोळी अभिनेत्री पल्लवी जोशीचा भाऊ आहे. अलंकारला अनुजा आणि अनिशा या दोन मुली आहेत. त्यापैकी अनुजा वडिलांच्या पावलांवर पाऊल ठेवत अभिनय क्षेत्रात पदार्पण करत आहे. 'हॅलो मिनी' या वेब सीरिजमधून ती प्रेक्षकांच्या भेटीला येणार आहे. ही सीरिज पंधरा भागांची असून फारुक कबीर यांनी दिग्दर्शित केली आहे. अनुजानेसुद्धा बालकलाकार म्हणून काम केलं होतं. मास्टर अलंकार सध्या अमेरिकेत असून तिथे त्याचा मोठा व्यवसाय आहे.
