अभिनेता रणवीर सिंग आणि दीपिका पदुकोण यांच्या लग्नानंतर आता बॉलिवूडमध्ये आणखी एका लग्नाची जोरदार चर्चा आहे. बॉलिवूडची देसी गर्ल अर्थात प्रियांका चोप्रा प्रियकर निक जोनाससोबत विवाहबंधनात अडकणार आहे. गेल्या काही दिवसांपासून तिच्या लग्नाविषयीच्या बातम्या दररोज पाहायला मिळत आहेत. यामुळेच ती स्कोर ट्रेंड्स इंडियाच्या यादीत ‘न्यूजप्रिंट मीडिया’मध्ये सर्वाधिक चर्चित अभिनेत्री झाली आहे. प्रियांका- निकच्या लग्नात कोणकोणते सेलिब्रिटी हजेरी लावणार, हे लग्न कुठे- केव्हा होणार, वर-वधू कोणते वस्त्र परिधान करणार अशा अनेक गोष्टी जाणून घेण्यासाठी चाहते उत्सुक आहेत. याविषयीच्या बातम्या गेल्या आठवड्याभरात सातत्याने प्रत्येक भारतीय वृत्तपत्रात होत्या. गेल्या काही आठवड्यांमध्ये प्रसारमाध्यमांमध्ये दीपिका-रणवीरच्या लग्नानंतर आता प्रियांका आणि निकचा विवाह चर्चेत आलाय. म्हणूनच तिस-या स्थानी असलेली प्रियांका लोकप्रियतेत अग्रणी स्थानावर आली आहे. वाचा : भारताचा पहिला सुपरहिरो परतला; 'शक्तिमान' आता अॅमेझॉन प्राइमवर अमेरिकेतील मीडिया टेक कंपनी स्कोर ट्रेन्ड्स इंडियाद्वारे ही प्रमाणित आणि संशोधित आकडेवारी उपलब्ध झाली आहे. स्कोर ट्रेंड्सचे सह-संस्थापक अश्वनी कौल याविषयी सांगतात, 'निक जोनास आणि प्रियांका चोप्रा दोघांचीही जगभरात लोकप्रियता आहे. यामुळेच वृत्तपत्रांमध्ये दीपिका-रणवीरपेक्षा जास्त निक- प्रियांकाला प्रसिद्धी मिळत आहे. प्रियंकाचा शाही विवाहसोहळा आणि त्याविषयी दरदिवशी येत असलेल्या बातम्यांमुळे ती न्यूजप्रिंटमध्ये सर्वाधिक चर्चित स्टार ठरली आहे.' १४ भारतीय भाषांमधील ६००हून अधिक बातम्यांच्या स्त्रोतातून ही माहिती गोळा करत असल्याचं अश्वनी सांगतात. यामध्ये फेसबुक, ट्विटर, मुद्रित प्रकाशने, सोशल मीडियावरील व्हायरल न्यूज, ब्रॉडकास्ट आणि डिजिटल प्लॅटफॉर्म यांचा समावेश आहे.