संपूर्ण देशात सध्या टिक-टॉकचा बोलबाला आहे. टिक-टॉकचा व्हिडीओ बनवणारा एक तरी व्यक्ती प्रत्येक घरात असून त्याचे फॅड दिवसेंदिवस वाढत असल्याचे दिसत आहे. फेसबुक, व्हॉट्सअॅप आणि इंस्टाग्राम या सोशल मीडिया अॅपनंतर आता सर्वांना टिक- टॉकचे वेड लागले आहे. याला सेलिब्रिटीसुद्धा अपवाद नाहीत. 'राम तेरी गंगा मैली' या चित्रपटाच्या निमित्ताने प्रेक्षकांच्या मनात घर करून गेलेल्या अभिनेत्री मंदाकिनीचा एक टिक-टॉक व्हिडीओ सध्या सोशल मीडियावर धुमाकूळ घालतोय. या व्हिडीओत मंदाकिनी एका तरुणीसोबत 'राम तेरी गंगा मैली' या चित्रपटातील 'सुन साहिबा सुन' या गाण्याचे बोल बोलताना दिसत आहे. टिक-टॉकवर या व्हिडीओला ८५ हजारांहून अधिक लाइक्स मिळाले असून प्रतिक्रियांचा पाऊस पडत आहे. 'इतक्या वर्षांनी तुम्हाला पाहून खूप आनंद झाला', 'सर्वांत आवडती अभिनेत्री' अशा शब्दांत नेटकरी त्यांच्या भावना व्यक्त करत आहेत. ‘राम तेरी गंगा मैली’ या चित्रपटातील मंदाकिनीचा साधाेभोळापण, तितकाच मादक अंदाज अनेकांची मनं जिंकून गेला. बोल्ड अंदाजामुळे चर्चेत आलेली ही अभिनेत्री चित्रपटसृष्टीतील आघाडीच्या अभिनेत्रींच्या यादीत दिसेल अशी अनेकांचीच अपेक्षा होती. पण, नियतीच्या मनात मात्र वेगळीच खेळी होती. कुख्यात डॉन दाऊदशी तिचे प्रेमसंबंध असल्याचे म्हटले गेले होते. दाऊदसोबत नाव जोडले जात असल्याच्या चर्चांना उधाण येताच मंदाकिनी एकाएकी चित्रपटसृष्टीपासून दूर गेली.
