गेल्या काही काळात बॉलिवूडमधील कास्टिंग काऊचची अनेक प्रकरणे उघडकीस आली. अनेक अभिनेत्रींनी, कलाविश्वाशी निगडीत महिलांनी त्यांच्यावर झालेल्या अन्यायाला वाच्या फोडली. मात्र तरीदेखील ‘कास्टिंग काऊच’चा प्रकार आजही सर्रास सुरू असल्याचं पाहायला मिळतं. यामध्येच छोट्या पडद्यावरील लोकप्रिय अभिनेत्री रश्मी देसाईने तिला 'कास्टिंग काऊच’चा सामना करावा लागल्याचं सांगितलं. 'उतरन' या मालिकेतील तपस्या या भूमिकेमुळे प्रेक्षकांच्या लक्षात राहिलेल्या रश्मीने अलिकडेच झालेल्या 'बिग बॉसच्या १३'व्या पर्वात सहभाग घेतला होता. हा शो संपला असला तरी रश्मी वेगवेगळ्या विषयांमुळे चर्चेत आहे. यातच 'पिंकव्हिला'ला दिलेल्या मुलाखतीत तिने कास्टिंग काऊचचा धक्कादायक अनुभव शेअर केला. 'मी एकदा ऑडिशनला गेले असताना माझ्या ड्रिंकमध्ये अमली पदार्थ मिसळण्यात आले होते. मात्र हा प्रकार माझ्या आईला समजल्यानंतर तिने संबंधित इसमाला चांगलाच धडा शिकवला होता', असं रश्मीने सांगितलं. "मी १३ वर्षांपूर्वी जेव्हा मी करिअरला सुरुवात केली त्यावेळी वयाने आणि अनुभवाने लहान होते. तसंच माझ्या कुटुंबाला कलाविश्वाचा वारसाही नव्हता. त्यामुळे माझा स्ट्रगल सुरु होता. याच दरम्यान, जर तू कास्टिंग काऊचचा सामना केला नाहीस तर तुला कधीच काम मिळणार नाही, असं सूरज नामक व्यक्तीने मला सांगितलं होतं. आता तो कुठे असतो, काय करतो याविषयी मला काहीच माहित नाही. परंतु सुरुवातीला त्याने मला स्टॅटिस्टिक्सबद्दल विचारलं. खरं तर मला तेव्हा त्याचा अर्थ माहित नव्हता. इतकंच नाही तर मला या गोष्टींची कल्पना नाही हे त्याला माहित होतं", असं रश्मी म्हणाली. पुढे ती म्हणते, "तो पहिला व्यक्ती होता ज्याने माझा फायदा घेण्याचा, मला फसवण्याचा आणि माझी छेड काढण्याचा प्रयत्न केला. एकदा त्याने मला ऑडिशनसाठी बोलावलं. मीदेखील त्याच्यावर विश्वास ठेऊन गेले. मात्र तेथे गेल्यावर माझ्या लक्षात आलं की आमच्या दोघां व्यतिरिक्त तिथे कोणीच नाहीये. फक्त एक कॅमेरा होता. त्याने माझ्या ड्रिंकमध्ये अमली पदार्थ मिसळून मला बेशुद्ध करण्याचा प्रयत्न केला. मी सतत त्याला मला हे असलं काही करायचं नाहीये हे सांगत होते.जवळपास दोन तास त्याच्याशी याविषयावर वाद घातल्यानंतर मी तेथून सुखरुप बाहेर पडले. त्यानंतर घरी गेल्यावर आईला सांगितलं. हा प्रकार ऐकल्यानंतर माझी आई त्याला भेटायला गेली आणि त्याच्या कानशिलात लगावली". वाचा : रश्मी देसाईसाठी ‘या’ अभिनेत्याला खावा लागला मार! दरम्यान,चित्रपटसृष्टीच नाही तर राजकारणापासून सगळ्याच क्षेत्रांत कास्टिंग काऊच वर्षानुवर्ष होत आले आहेत. अनेक महिलांना या सगळ्याचा सामना करावा लागला आहे. काही महिलांनी याविरुद्ध आवाज उठवला तर काही महिला आजही गप्प आहेत.
