ज्ञानेश झोटिंग दिग्दर्शित ‘राक्षस’ असे हटके नाव असलेला मराठी चित्रपट लवकरच प्रेक्षकांच्या भेटीस येत आहे. या चित्रपटात प्रमुख भूमिकेत एक जबरदस्त ‘बाहुबली’ आवाज असलेला अभिनेता आपल्या भेटीला येईल, ज्याने संग्राम ही खलनायकाची ‘लय भारी’ भूमिका साकारत तमाम मराठी रसिकांची मनं जिंकली होती तो अभिनेता म्हणजे शरद केळकर. प्रसिद्ध अभिनेत्री सई ताम्हणकर आणि शरद केळकर अशी नवीन, फ्रेश जोडी प्रेक्षकांना ‘राक्षस’ ‘या चित्रपटात पाहायला मिळणार आहे. शरद केळकर हा अविनाशची व्यक्तीरेखा साकारत असून तो एक डॉक्युमेंट्री मेकर आहे, त्याच्या आयुष्याला कलाटणी देणारी घटना ‘राक्षस’ मध्ये पाहायला मिळणार आहे.
वाचा : जाणून घ्या, सलमान-कतरिनाच्या ‘टायगर जिंदा है’ ची कमाई
चित्रपटाविषयी शरद म्हणाला की, या चित्रपटाची कथा ऐकली त्याक्षणी मला वाटले की आपण या चित्रपटाचा भाग व्हावे. माझ्यासाठी अतिशय आव्हानात्मक अशी ही भूमिका होती. प्रेक्षकांना आणि माझ्या चाहत्यांना हा रहस्यपट नक्की आवडेल असा मला विश्वास आहे.
‘राक्षस’ असा शब्द उच्चारला तरी अंगावर शहारे आल्याशिवाय राहत नाहीत. राक्षसाची विविध रूपे आजपर्यंत आपण गोष्टींमध्ये ऐकलेली आहेत. आदिवासी पाड्यांवर लहानपण गेलेल्या ज्ञानेश झोटींग यांचं ‘राक्षस’चे लेखन अनुभवसिद्ध असून त्यांनी त्यांचे बालपणीचे अनुभव चित्रपटाच्या कथेत अतिशय सुंदरपणे गुंफले आहेत.
वाचा : मुक्ता बर्वेचं नवं नाटक ‘ढाई अक्षर प्रेम के’
राक्षस चित्रपटात ऋजुता देशपांडे, दयाशंकर पांड्ये, विजय मौर्य, याकूब सैद, पूर्णानंद वांदेकर, उमेश जगताप, विठ्ठल काळे,पंकज साठे, अनुया कळसकर, अनिल कांबळे, मकरंद साठे, जयेश संघवी, सविता प्रभुणे, साक्षी व्यवहारे, अभिजित झुंझारराव, सोमनाथ लिंबारकर या कलाकारांच्याही भूमिका आहेत.
दरम्यान शरद केळकरचा वेगळा लूक असलेल्या या नव्या पोस्टरमुळे चित्रपटाबद्दलची उत्सुकता ताणली गेली आहे. या ‘राक्षस’ मध्ये नेमकं काय गुढ दडले आहे याची उकल येत्या २३ फेब्रुवारी २०१८ रोजी होणार आहे.
