#Sanju : येरवड्यातून बाहेर आलेला ‘संजू’ म्हणतोय, ‘अपना लाइफ फुल सापसिडी का बोर्ड है’ - Marathi News | Sanju Teaser And Poster Released Ranbir Kapoor Head To Toe Transformation To Different Shades Of Sanjay Dutt

संजय दत्तच्या भूमिकेतील रणबीर कपूरचा लूक थक्क करणारा आहे.

रणबीर कपूर

संजय दत्तच्या बहुचर्चित बायोपिकचा पहिला पोस्टर आणि टीझर नुकताच प्रदर्शित झाला आहे. राजकुमार हिरानी दिग्दर्शित या चित्रपटाचं नाव ‘संजू’ असं आहे. रणबीर कपूर यामध्ये संजूबाबाची भूमिका साकारणार असून त्याच्या लूकमध्ये झालेला बदल थक्क करणारा आहे. आईला गमावल्यापासून ते कारागृहाच्या शिक्षेपर्यंत संजूबाबाच्या आयुष्यातील चढउतार या चित्रपटाच्या माध्यमातून लोकांसमोर येणार आहे. रणबीर कपूरसोबतच यामध्ये सोनम कपूर, अनुष्का शर्मा, दिया मिर्झा, मनिषा कोइराला यांच्याही महत्त्वपूर्ण भूमिका आहेत.

एक मिनिट २५ सेकंदांच्या या टीझरमध्ये संजय दत्तची जीवनगाथाच मांडली आहे. ‘अपना लाइफ फुल सापसिडी का बोर्ड है’, असं म्हणत रणबीर येरवडा कारागृहातून बाहेर पडताना या टीझरची सुरुवात होते. अमली पदार्थांच्या व्यसनापासून ते कारागृहात रवानगीपर्यंत सर्वकाही यात पाहायला मिळतंय. ३०८ गर्लफ्रेंड्स आणि एक एके ५६ रायफल यांचाही टीझरमध्ये उल्लेख आहे. संजू- माणूस एक आयुष्य अनेक, अशा टॅगलाइनसह प्रदर्शित झालेल्या टीझरचीच चर्चा सध्या सोशल मीडियावर पाहायला मिळत आहे.

पाहा टीझर-

One man…many lives! #RanbirKapoor in and as #Sanju. pic.twitter.com/vhZUemQoGW
— Filmfare (@filmfare) April 24, 2018

यामध्ये संजय दत्तच्या आईची म्हणजेच नर्गिस यांची भूमिका मनिषा कोइराला साकारणार असून परेश रावल त्याच्या वडिलांची भूमिका साकारणार असल्याचं म्हटलं जात आहे. दिया मिर्झा संजूबाबाची पत्नी मान्यता दत्तच्या भूमिकेत तर अनुष्का शर्मा एका पत्रकाराच्या भूमिकेत पाहायला मिळणार आहे. येत्या २९ जून रोजी हा चित्रपट प्रेक्षकांच्या भेटीला येणार आहे.

First published on: 24-04-2018 at 13:55 IST

मराठीतील सर्व मनोरंजन बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Sanju teaser and poster released ranbir kapoor head to toe transformation to different shades of sanjay dutt