करोना व्हायरसशी दोन हात करण्यासाठी प्रत्येकजण जमेल तशी मदत करायला तयार आहे. सामान्यांपासून सेलिब्रिटींपर्यंत मदतीचा ओघ येऊ लागला आहे. बॉलिवूडचा किंग खान अर्थात शाहरुखने याआधी पीएम केअर फंडला आर्थिक मदत केली. त्यानंतर आता त्याने आरोग्य सेवेतील कर्मचाऱ्यांसाठी तब्बल २५ हजार पीपीई किट्सचे वाटप केले आहे. (‘पर्सनल प्रोटेक्टिव्ह इक्विपमेंट’) करोनाग्रस्तांवर उपचार करण्याऱ्या डॉक्टर, नर्सेस यांची सुरक्षा अधिक महत्त्वाची आहे. त्यामुळे त्यांच्या सुरक्षेसाठी शाहरुखने हे पीपीई किट्स वाटले आहेत. शाहरुखच्या या बहुमोलाच्या मदतीसाठी आरोग्य मंत्री राजेश टोपे यांनी ट्विट करत त्याचे आभार मानले आहेत.

“शाहरुख खान यांनी २५ हजार पीपीई कीट देऊन जो मदतीचा हात पुढे केला आहे. त्यासाठी त्यांचे मनापासून आभार. करोना विषाणूविरुद्ध लढा देण्यामध्ये याची आम्हाला मदत होईल आणि वैद्यकीय उपचार टीमच्या आरोग्याची काळजीदेखील घेतली जाईल”, असं ट्विट आरोग्य मंत्री राजेश टोपे यांनी केलं आहे. तर शाहरुखनेही त्यांचे आभार मानत सध्याच्या काळात सर्वांना एकत्र येऊन काम करण्याची गरज असल्याचं सांगितलं. ‘या किट्ससाठी तुम्ही जी मदत केली त्याबद्दल धन्यवाद. मानवजातीच्या सुरक्षेसाठी आपण सर्वजण एकत्र येऊन लढुयात. तुमची मदत करणे हे आमचे कर्तव्य आहे. तुमची टीम आणि कुटुंबसुद्धा निरोगी व स्वस्थ राहू दे’, असं ट्विट शाहरुखने केलं.

शाहरुखने वांद्रे येथील त्याची चार मजली कार्यालयीन इमारत विलगीकरणासाठी मुंबई महापालिकेला दिली आहे. शाहरुख आणि गौरीने मदतीचा हात पुढे केल्याने महापालिकेने त्यांचे विशेष आभार मानले होते. त्याआधी त्याने २ एप्रिल रोजी करोनाशी लढा देण्यासाठी पुढाकार घेत मदत जाहीर केली होती. त्याने आपल्या कंपन्या कोलकाता नाइट रायडर, रेड चिलीज एंटरटेनमेंट, मीर फाऊंडेशन आणि रेड चिल्लीज VFX डून सात संस्थांना निधी देत असल्याचं जाहीर केलं होतं. याशिवाय ५० हजार पीपीई किट्ससाठी सरकारला निधी, मुंबईतील ५५०० कुटुंबाना तसंच १० हजार लोकांना जेवण, रुग्णालयांसाठी २००० जणांचं जेवण, दिल्लीतील २५०० रोजंदारी कामगार आणि १०० अॅसिड हल्ला पीडितांना किराणा सामान इतकी मदत शाहरुखने जाहीर केली आहे.