देशात पुन्हा एकदा करोनाच्या संक्रमाणाचा धोका वाढत चालला आहे. वाढती रुग्णसंख्या आणि मृतांचा आकडा चिंता वाढवणारा आहे. एकीकडे लसीकरणाला सुरुवात झाली असली तरी दरोरोज करोना रुग्णांच्या संख्येत झपाट्याने वाढ होताना दिसतेय. लसीकरण सुरु झालं असलं तरी अद्याप केवळ 45 वर्षांवरील लोकांना लस उपलब्ध करून देण्यात आली आहे. करोनाची वाढती रुग्ण संख्या पाहता बॉलिवूड अभिनेता सोनू सूद याने 25 वर्षांवरील जनतेसाठीदेखील लस उपलब्ध करून द्यावी अशी सरकारकडे मागणी केली आहे. सोनू सूदने एक ट्विट करत सरकारला अपील केली आहे. " मी विनंती करतो की 25 वर्ष आणि त्यावरील जनतेसाठी लसीकरण सुरू करण्यात यावं. रुग्ण संख्या वाढतेय त्यात लहान मुलांनादेखील करोनाची लागण होतेय. त्यामुळे 25 वर्षांवरील जनतेसाठीदेखील लसीकरणाची घोषणा करण्याची वेळ आली आहे. तरुणांमध्ये रुग्णसंख्या वाढताना दिसून येतेय." अशा आशयाचं ट्विट सोनूने केलं आहे. I urge @MoHFW_INDIA to consider 25 years and above getting vaccinated too. With number of cases rising and even kids getting infected in large numbers with virus it's high time we announce the vaccination for 25 years and above. Max number of cases I come across are youngsters. — sonu sood (@SonuSood) April 8, 2021 सोनू सूदने नुकतीच अमृतसर इथं एका रुग्णालयात करोनाची लस घेतली आहे. यावेळी त्यांने सोशल मीडियावरून माहिती दिली होती. "मी करोनाची लस घेतली आहे. आता माझ्या देशाने करोनाची लस घ्यावी. आज पासून आम्ही संजीवनी नावाचं नवं लसीकरण अभियान सुरू केलं आहे. हे अभियान लोकांमध्ये जनजागृती करेल आणि लसीकरणासाठी प्रोत्साहन देईल." असं त्याने यावेळी सांगितलं. देशावर करोनाचं संकट ओढावल्यापासून सोनू सूदने अनेक गरजूंना मदत करण्याचं काम हाती घेतलं आहे. त्याचसोबत जनतेमध्ये जनजागृती करण्यासाठी देखील त्याने पुढाकार घेतला आहे.