बॉलिवूड अभिनेता आमिर खानची मुलगी आयरा खान सोशल मीडियावर नेहमीच चर्चेत असते. कामापेक्षा जास्त आयराच्या खासगी आयुष्याची जास्त चर्चा होताना दिसते. सध्या ती आमिर खानचा फिटनेस ट्रेनर नुपूर शिखरेला डेट करत आहे. अनेकदा ती बॉयफ्रेंड नुपूरसोबतचे फोटो सोशल मीडियावर शेअर करताना दिसते. आताही तिने काही फोटो सोशल मीडियावर शेअर केले आहेत ज्यामुळे आयरा लवकरच लग्न करणार असल्याच्या चर्चा रंगल्या आहेत.
आमिरची लेक आयरा खान मागच्या दोन वर्षांपासून फिटनेस ट्रेनर नुपूर शिखरेला डेट करत आहे. दोघंही सोशल मीडियावर एकमेकांसोबतचे फोटो आणि व्हिडीओ शेअर करताना दिसतात. आता आयरानं बॉयफ्रेंड नुपूर शिखरे आणि आजी जीनत हुसैन यांची भेट घालून दिली. या भेटीचे काही फोटो आयरानं तिच्या इन्स्टाग्रामवर शेअर केले आहेत. ज्याची सोशल मीडियावर जोरदार चर्चा होताना दिसत आहे.
आजी आणि नुपूरसोबतचे फोटो इन्स्टाग्रामवर शेअर करताना आयरानं लिहिलं, “सहजच काढलेले आनंदी फोटो” या फोटोंमध्ये आयरा, नुपूर आणि जीनत हुसैन हसून फोटोसाठी पोज देताना दिसत आहेत. आयराच्या या फोटोंवर चाहत्यांनी धम्माल कमेंट केल्या आहेत. अनेकांनी तर तिला ‘लग्न करणार आहेस का?’ असा प्रश्न देखील कमेंटमध्ये विचारला आहे. जीनत आणि नुपूर यांच्या भेटीवरून आयरा लवकरच लग्न करणार असल्याचा अंदाज चाहत्यांनी लावला आहे.
आणखी वाचा- “थोडी तरी लाज बाळग…”, मुलगी आयरा खानच्या ‘त्या’ फोटोवरून आमिर खान झाला ट्रोल
दरम्यान नुपूर शिखरे आणि आयरा खाननं मागच्या वर्षीच त्यांच्या नात्याची कबुली सोशल मीडियावरून दिली होती. त्यानंतर अनेकदा तिने नुपूरसोबतचे रोमँटिक फोटो सोशल मीडियावर शेअर केले होते. याशिवाय आयरानं नुपूरच्या कुटुंबियांसोबत दिवाळी साजरी केली होती. तर ख्रिसमस सेलिब्रेशनसाठी नुपूर आयराच्या कुटुंबासोबत दिसला होता. अगदी अलिकडेच आयरानं त्यांच्या नात्याला २ वर्षं पूर्ण झाल्याच्या निमित्ताने एक इमोशनल पोस्ट शेअर केली होती.
